Qostanaı oblysynyń turǵyny jumys kóliginde uıyqtap jatqan polıseıdi vıdeoǵa túsirip, balaǵattaǵany úshin keshirim surady. Bul týraly Tengrinews.kz saıty jazdy.

Qostanaılyq Sergeı Zınchenko qalanyń ortalyǵyndaǵy kósheniń shetinde patrúl kóliginde uıyqtap jatqan polıseıdi vıdeoǵa túsirip, jelige jarıalaǵan. Bılik ókili ózin vıdeoǵa túsirip jatqanyn baıqap qoıady da óziniń uıaly telefonyn qaraı bastaıdy. Sergeı polıseıden ózin tanystyryp, qujat kórsetýin talap etedi, jaýap ala almaǵan soń rolık avtory beıádep sózder aıtyp, polıseıdi balaǵattaıdy. Keıin vıdeo toqtap qalyp, ári qaraı ekeýi kólikke otyrǵan sátte beınejazba jalǵasady.

"Dosym, kózime qarashy, senińshe istep otyrǵanyń durys pa? Sizder zeınetke 45 jasta shyǵasyzdar, jeńildikter alasyzdar, ár jarty jyl saıyn jalaqylaryńyz kóteredi. Sonyń bári sonda uıyqtaý úshin be? Sen uıyqtap jatqan joqpyn degiń kele me? Kóliktegi oryndyqtardyń ekeýi de jatqyzylǵan, demek ekeýide uıyqtap jatyr" deıdi rolık avtory.

Polısıa departamentindegiler atalǵan fakt boıynsha qyzmettik tergeý bastalǵanyn málimdedi.

"Polısıa departamentinde vıdeomen tanysqannan keıin polıseıge qatysty qyzmettik tergeý bastaý týraly sheshim shyǵaryldy. 33 jastaǵy qostanaılyqqa qatysty bılik ókiline til tıgizgeni úshin sotqa deıingi tergeý bastaldy" dep habarlady Qostanaı oblysy polısıa departamentindegiler.

Uıyqtap jatqan qyzmetkerdi vıdeoǵa túsirgen Sergeı Zınchenko óziniń qylyǵy úshin keshirim surap beınejazba túsirdi.

"1 tamyz kúni jolda ketip bara jatyp uıyqtap jatqan qyzmetkerdi kórdim. Toqtap "sógis" jarıalaý úshin vıdeo túsirdim. Sodan keıin ketip qaldym. Ol meniń artymnan qýyp jetti. Sóıleseıik, dep kólikke otyrdyq. Men alkogól iship, mas kúıde bolǵandyqtan artyq sóılep qoıdym, MAI qyzmetkeri jáne júıege qatysty beıádep sózder aıttym, ashýlanyp aıtyp qoıdym, soǵan ókinemin" deıdi qostanaılyq jigit.