«Nur Otan»-da partıaishilik saılaýdyń birinshi kezeńi boıynsha saılaýshylardyń daýysyn esepteý jumysy aıaqtaldy. Praımerız ótkizý jónindegi Ortalyq uıymdastyrý komıtetiniń aqparatyna sáıkes, tórt kúnge sozylǵan daýys berýge 662 687 adam qatysty. Bul – aqparattyq júıede tirkelgen partıa músheleriniń 84 %-y.

Saılaýshylardyń basym bóligi, ıaǵnı 581 104 adam onlaın daýys berdi. 81 583 partıalyq dástúrli ádisti paıdalanyp, saılaý ýchaskelerine keldi.
«Qaǵaz búletenderdiń barlyǵy partıanyń Ortalyq uıymdastyrý komıtetine jetkizilip, rastaldy. Máselen, Jambyl, Túrkistan jáne Qyzylorda oblystarynyń shalǵaı aýdandarynan jetkizilgen qaǵaz búletenderdiń sońǵy legin tańerteń aldyq. Endi búkil málimet «Praımerız» aqparattyq júıesine tolyq salynyp, barshaǵa qoljetimdi boldy (https://nurotan.kz jáne https://primaries.kz saıtynda)», - dedi partıa Hatshysy Arman Qyryqbaev.

Onyń aıtýynsha, praımerızde baq synaýǵa 10 990 adam tirkelgen. Olardyń 36,7% – áıelder, 29% – 35 jasqa deıingi jastar. Bastaýysh partıa uıymdarynan kandıdattardyń 30% usynylsa, 70% – ózin-ózi usynǵandar. Úmitkerlerdiń ortasha jasy 43 jasty qurady.

«Osy kórsetkishterdiń ózi-aq elimizde ǵana emes, búkil Orta Azıada tuńǵysh ret uıymdastyrylǵan jańa saıası qural – praımerızge jurttyń erekshe qyzyǵýshylyq tanytqanyn jáne onyń óz deńgeıinde ótkenin aıqyn kórsetti.
Elbasy, partıa Lıderi Nursultan Nazarbaev saıası dodany ótkizer aldynda «Praımerızdiń mindeti – halyqtyq partıalyq tizimderdi qalyptastyrý» dep atap ótken bolatyn. Praımerız nátıjesi partıa Lıderi qoıǵan tapsyrmanyń oryndalýyna qajetti alǵysharttyń naqty jasalǵanyn kórsetip otyr.

Bastapqyda týyndaǵan keıbir kúdik pen kúmánge qaramastan, praımerız óte qarqyndy da tartysty ótti. Ásirese, dodaǵa qatysqandar arasynda jastar men áıelder qatary mol. Mysaly, praımerızde baq synaýǵa 10 990 adam tirkelse, olardyń 36,7% - áıelder, 29% – 35 jasqa deıingi jastar boldy. Qatysýshylardyń ortasha jasy – 43 jas.

Tujyrymdap aıtsaq, birinshiden, partıa praımerızdiń arqasynda óz qatarlastary arasynan eldiń qoldaýy men senimine ıe bolǵan úzdikterdi iriktedi.

Ekinshiden, praımerız ótkizý barysynda partıanyń aýyzbirshiligi artyp, ortaq maqsat jolyndaǵy murattas jandardyń birtutas kúshine aınaldy. Iaǵnı, praımerız partıalastardy bir-birimen tyǵyz baılanystyratyn, birligin bekemdeıtin dánekerlik qyzmet atqardy.

Praımerız barysynda halyqtyń nazaryna usynylǵan 216 saılaýaldy baǵdarlamanyń jobasy oı eleginen ótkizilip, oǵan 20 myńnan astam usynys jınaldy. Tyńnan oı qosylyp, atalǵan jobalar halyqtyq sıpat ıelendi.
Biz elimizde ótken praımerızde onyń shet elderde qalyptasqan klasıkalyq úlgisine tán belgilerdiń barlyǵy da kórinis tapqanyna kýá boldyq.

Qatysýshylar arasynda pikirsaıys ta, tartys ta, tipti keıde bir-birin aıyptaý da ushyrasty. Biraq bári de bekitilgen erejege saı, ádepten aspaı ótti. Bul jerde jeńgen men jeńilgen degen joq. Bári de utty. Praımerız eń aldymen elimiz úshin ıgi is boldy.

Búkil praımerız ótkizý kezeńi boıy Partıalyq baqylaý komıteti tyńǵylyqty jumys jasap, tártip buzýshylyqtarǵa jedel nazar aýdaryp, tıisti sharalar qabyldady. Atap aıtqanda, 30-dan astam aryz ben ótinish qaraldy.

Praımerız ótkizý erejesin buzǵany úshin partıanyń 20 múshesi jaýapkershilikke tartyldy, daýystardy burmalaý faktileri úshin 7 kandıdat, praımerız ótkizý erejesin saqtamaǵany úshin 27 úmitker tirkeýden shyǵaryldy.
Jalpy, praımerız nátıjesinde Elbasy bastamasymen byltyr qolǵa alynǵan partıany «qaıta jandandyrý» baǵdarlamasy túıindeldi. Partıa túbegeıli jańǵyryp, qatary jańa tulǵalarmen tolyqty. Osylaısha, «Myqty lıderler – myqty partıa» qaǵıdaty júzege asty.

«Nur Otan» partıasy – memlekettiligimizdiń myzǵymaýyn, elimizdiń ósip órkendeýin qamtamasyz etýge de birden bir qaýharly saıası kúsh. Muny praımerız nátıjeleri anyq kórsetti. Partıa elimizde jańa saıası mádenıetke negiz qalady. Osynaý aıtýly sharaǵa qatysqan barsha úmitkerdi shyn júrekten quttyqtaımyz!» - dep jazdy Arman Qyryqbaev.