Saılaý kezinde respýblıkadaǵy 7 myńnan astam mekteptiń 5 522 mektebi saılaý ýchaskesi úshin paıdalanyldy; mektepke deıingi 6 651 uıymnyń 143-i; 644 orta bilim berý uıymynyń 215-i; 125 joǵary oqý ornynyń 53-i jáne 22 mektep-ınternaty men sport mektebi, 114 joǵary oqý ornynyń jataqhanalary, sonymen qatar ózge bilim berý uıymdarynda ornalasqan 12 úıirme nysany (mektep oqýshylaryna arnalǵan saraı, shyǵarmashylyq úıi, mýzykalyq mektepter) paıdalanyldy dep jazdy sanıtarlyq epıdemıologıalyq baqylaý komıteti.

QR Bas memlekettik sanıtar dárigerdiń 2020 jylǵy 29 jeltoqsandaǵy №69 «Qazaqstan Respýblıkasy Parlamenti Májilisi men máslıhattary depýtattarynyń saılaýyn uıymdastyrýda jáne ótkizýde COVID-19-dyń taralýynyń aldyn alý sharalary týraly» qaýlysyna sáıkes, saılaý ýchaskesi retinde paıdalanylǵan bilim berý mekemelerinde saılaý aıaqtalǵannan keıin zalalsyzdandyrý sharalary uıymdastyrylady.

Dezınfeksıalyq is-sharalar aıaqtalǵan soń mektep qabyrǵasynda kezekshi synyptar men 9, 11 synyptar úshin dástúrli formattaǵy oqý prosesi ár túrli ýaqytta (birinshi nemese ekinshi aýysymda) bastalady.

Daýys berý prosesin uıymdastyrýda paıdalanylmaǵan jáne dezınfeksıany aıaqtaǵan uıymdarda oqytý 2021 jylǵy 11 qańtarda mektep qabyrǵasynda (birinshi nemese ekinshi aýysymda) bastalady.

Dezınfeksıalyq is-sharalar aıaqtalmaǵan bilim berý uıymdarynyń oqýshylary 11 qańtarda onlaın formatta, ıaǵnı qashyqtan oqıtyn bolady.

Osylaısha, elimizdiń barlyq mektepterinde úshinshi toqsan bekitilgen kestege sáıkes 11 qańtarda qashyqtan nemese dástúrli formatta bastalady.