Parlament májilisi saılaýyna qatysqan jýrnalıs, "Adal" partıasynyń múshesi Maqsat Tolyqbaı óziniń paraqshasynda oqyrmandaryna ýáde etken úndeýin jarıalady. Onyń aıtýynsha, jumys endi bastalady. Demokratıa, ózgeris ózdiginen kele salmaıdy.

–  Májiliske men ótpeı qalǵan shyǵarmyn. Sizder qoldaǵan, daýys bergen "Adal" partıasynyń biraz azamattary depýtat bolyp jatyr. Oblysqa, aýdanǵa.

Keıbir adamdar túsinbeı de jatyr. Parlamentke ótken úsh partıa ne isteıdi? Olar ózdiginen zań shyǵarmaıdy. Qoǵamdyq tyńdaý, talqylaý bolady. "Adal" partıasy retinde bizder sol ár zań jobasyn talqylaýǵa qatysamyz. Biz de pikirimizdi aıtamyz, biz de málimdeme jasaımyz. Onyń syrtynda men óńirlerdi aralap júrgende kótergen máselem bar ǵoı. "Ár qazaq baı bolsynshy" degen. Kásip bastaǵysy keletin jumyssyz jastarǵa tegin granttardyń sanyn kóbeıtýimiz kerek. Mine, búgin partıa sheshim qabyldady. Aldaǵy ýaqytta "Adal" partıasynyń atynan biz tegin granttar taratatyn bolamyz. Sol jumys jalǵasa beredi. Tek úsh-aq nárse jetispeı qaldy bizge: jumsaq kreslo, tegin baspana jáne mıllıon teńge aılyq. Dalada qalǵan eshteńemiz joq. Qarapaıym oryndyqta otyryp ta jumys isteýge bolady.

Árıne, úmit bolmady emes, boldy. Biraq saılaýdy ótkizgen men emes qoı. Ol qalaı ótti, táýelsiz baqylaýshylar nendeı baǵa berdi? Onyń barlyǵyn ashyq aıtqan eki kandıdat bolsa, sonyń biri menmin. Ashyq pikirimdi bildirdim... Bul saılaý qalaı ótti, biz – sonyń kórinisimiz. Biraz azamattyń oıanýyna bizdiń de septigimiz tıdi dep oılaımyn. "Adal" partıasy eshqaıda joǵalyp ketpeıdi. Naǵyz jumys endi bastaldy. Orta jolda men partıadan shyǵyp ketsem, meniń tarapymnan satqyndyq bolady. Eger mende azamattyq ambısıa bolmasa, kresloǵa qyzyǵatyn adam bolsam, kez kelgen partıanyń atynan úgit-nasıhat jumystaryn júrgizip, qatysýyma bolar edi. "Adalǵa" adal boldym dep oılaımyn, – dedi jýrnalıs.

Oǵan qosa, Maqsat Tolyqbaı ózine qarsy jazba jarıalaǵandarǵa qatysty da pikir bildirdi.

– Maǵan qarsy post jazyp, 40 myń teńge alǵandar boldy. Osy vıdeony ózderi kórip otyr. "Maqsat Tolyqbaı sáláfıt, Bolat Nazarbaevtan kotej alǵan, Ablázovtyń tyńshysy" dep jazǵandar da boldy. Bir nárseni túsindim. Bul úlken saıası tehnologıa. Kim ramkadan shyqqysy keledi, kim ózgergisi keledi, osylaı aıaqtan tartýshylar bolady. Birimizdi birimiz aıaǵymyzdan shalatyn bolsaq, eshqashan basymyz birikpeıdi. 37-jyldan berip solaı, aǵaıyn. Qazaqty satqan da qazaq, atqan da qazaq. Sondyqtan ár azamatty qoldaýymyz kerek. Aıaqtan tartyp otyrsaq, eshteńe ózgermeıdi. Bir úlken istiń basy bastaldy. Bir aıdyń ishinde ne isteı alatynymyzdy kórsettik. 27 kún ishinde eshqandaı partıanyń tarıhynda bolmaǵan, 360 myń adamdy múshelikke ótkizdik, – degen ol mıtıńke shyǵýdyń oıda bolǵanyn, alaıda oǵan qoǵam daıyn emes ekendigin aıtty, – Mıtıńke shyǵý oıda bolmady emes, boldy... Ashshy da bolsa aıtaıyn, mundaıǵa bizdiń qoǵam áli daıyn emes. Men atoılap alańǵa shyǵaıyn, artymnan kóp bolsa 2000 adam erip shyǵady. Sodan ne ózgeredi? Sóıtip tarqaımyz, – dedi ol.