Arnaıy esepshotty qalaı ashý kerek

Otbasy bankinde zeınetaqy jınaqtaryn aýdarýǵa arnalǵan esepshotty eki jolmen ashýǵa bolady. Birinshisi -  "JSSB24" mobıldi qosymshasy. Ekinshisi – baılanys ortalyǵyna beıneqońyraý jasaý. Búginde Otbasy bankinen bólek Halyq banki de zeınetaqy jınaqtaryn paıdalaný júıesine operator retinde qosylyp, óz qosymshasynda arnaıy esepshottardy ashý qyzmetin iske qosty. Onda jınaqtyń esebinen ıpoteka rásimdeý, qaryzdy óteý jáne qaıta qarjylandyrý qarastyrylǵan. Al Otbasy bankinde turǵyn úı máselesimen birge emdeý sharalaryn da sheshýge bolady.

Ótinim qalaı jiberiledi

Ótinimder  www.enpf-otbasy.kz saıty arqyly jiberiledi. Eger arnaıy esepshot bolmasa, ony ótinim berý kezinde ashýǵa múmkindik bar. Ótinim maquldanǵannan keıin 5 jumys kúni ishinde zeınetaqy jarnalarynyń bir bóligi arnaıy esepshotqa túsedi. 

Portalǵa qandaı qujat júkteý kerek

Páterdi tolyǵymen satyp alsańyz, portalǵa jeke adammen nemese qurylys kompanıasymen aradaǵy satyp alý kelisimshartyn júkteý kerek. Budan bólek, osy qujattyń HQKO-da tirkelgeni týraly anyqtama jiberiledi. Al zeınetaqy jarnasyn alǵashqy jarna retinde paıdalanyp, ıpotekany "Otbasy bankinde" emes, basqa bankte rásimdeseńiz, sol banktiń kredıt berýdi maquldaǵany týraly hatty tirkeý kerek. 

Zeınetaqy jınaqtaryn jeke turǵyn úı qurylysyna paıdalaný úshin biraz qujat jınaý qajet. Sonyń ishinde sáýlet-josparlaý tapsyrmasy, merdigerlik týraly kelisimshart (ony arnaıy lısenzıasy bar qurylys kompanıasy beredi), qurylys-montajdaý jumystaryna ketetin shyǵyndar smetasy (ony da qurylys kompanıasy jasaıdy), eskızdi joba jáne qurylystyń bastalǵany týraly eskertý hat bar. Osy qujattardyń negizinde qurylys kompanıasyna aqsha aýdarylady. Biraq eki jyldan keıin úıdiń qurylysy aıaqtalǵany týraly qujatty jiberý kerek.

Esepshotqa aýdarylǵan soma 45 kún ishinde paıdalanylmasa...

Arnaıy esepshotqa aýdarylǵan zeınetaqy jınaǵyn paıdalanýǵa 45 kún beriledi. Al demalys kúnderin qosa eseptegende eki aıǵa deıin sozylady. Degenmen, qandaı da sebepterge baılanysty aqsha paıdalanbaı qalsa, bank ony qaıtadan Biryńǵaı jınaqtaýshy zeınetaqy qoryna aýdarady. Sosyn ótinimdi ekinshi ret berýge bolady.

Bes jyldyq shekteý qandaı ıpotekaǵa qatysty

Ipotekanyń merzimi bes jyldan artyq bolǵan jaǵdaıda, sondaı-aq, kredıt zeınetaqy jınaqtarynyń esebinen rásimdelse, úıdi bes jyl boıy satýǵa tyıym salynady. Osy norma tek ıpotekalyq qaryzdarǵa ǵana taralady. Al zeınetaqy jınaqtarynyń esebinen qaryz ótelse, bes jyldyq shekteý qoıylmaıdy.

Otbasy banki komısıa ala ma

Arnaıy esepshot ashý, odan aqsha aýdarý jáne taǵy basqa operasıalar úshin eshqandaı komısıa alynbaıdy. Salymshy óz aqshasyn 45 kúnniń ishinde paıdalanyp úlgermese de, barlyq qarjysy sol kúıinde Biryńǵaı zeınetaqy qoryna qaıtyrylady. 

Prosentsiz ıpoteka rásimdele me

Indýstrıa jáne ınfraqurylymdyq damý mınıstrligi birjolǵy zeınetaqy tólemin turǵyn úı jaǵdaıyn jaqsartýǵa paıdalaný erejesin bekitti. Onda ıslam bankiniń qarjylandyrý baǵdarlamalary aıasynda turǵyn úıdi satyp alý tetigi qarastyrylǵan. Osy sanattaǵy ıpotekanyń sharttary týraly banktiń ózinen bilýge bolady.

Jaqyn týystarǵa páter alýǵa bola ma

Árbir adam jetkiliktilik deńgeıinen asatyn zeınetaqy jarnasyn jaqyn týysyna bere alady. Portalda arnaıy qyzmet bar. Sol arqyly zeınetaqy jarnasyn jaqyn týysqa berýge bolady. Ol óz kezeginde berilgen aqshany alǵashqy jarna retinde paıdalanady, ıa bolmasa, tolyǵymen úıdi satyp alady. Erli-zaıyptylar da zeınetaqy jarnasyn bir-birine bere alady. Biraq óz aralarynda páter satýǵa jáne satyp alýǵa tyıym salynǵan. 

Shetelde páter satyp alý múmkin be

Birjolǵy zeınetaqy tólemin turǵyn úı jaǵdaıyn jaqsartýǵa paıdalaný erejesine sáıkes, úıdi tek Qazaqstan Respýblıkasynyń aýmaǵynda ǵana satyp alýǵa bolady.

Emdelý úshin paıdalanýǵa ótinish qalaı beriledi

Ázirshe, zeınetaqy jınaqtarynyń bir bóligin emdeý sharalaryna paıdalaný aıasynda Otbasy banki ǵana qyzmet kórsetýge kelisti. Osy maqsatta da arnaıy esepshottar ashylady.

sputnik.kz