Qazaq ǵalamtory nege básekege qabiletsiz? Qazaq jýrnalıseri nege aqparatty tez ári naqty bere almaıdy? Alaı isteý kerek edi, bulaı isteý kerek edi… Bul sózder qazir ekiniń biri aıtatyn «dop-domalaq» synǵa aınaldy. Naryq zamanynda ár sharýanyń aınalyp kelip qarjyǵa tireletinin bilsede bilmeske salady keıbireýler. Basqasy basqa, ultqa jumys jasaımyn dep, qazaqtyń týyn kótergen baspasózge dál qazir býmalap aqsha beretin bılik te, aqsúıek te joq. Shúkirligi, búigingi jas qazaqtar qur tulpqa qarap móńirep turmaıdy. Qolynan ne keledi, sony jasaıdy jáne mindetsimeıdi. «Qamshy» portaly da bisimillásin sáıgúlik shabyspen bastap, bir jyldan beri ógiz aıańǵa túsken. Áıteýir, baǵyty anyq, maqsaty berik (http://qamshy.kz/?page_id=29). «Abaı.kz»-tiń artynan erip, «Masa.kz»-pen qol ustasyp kele jatyr… Mine, sanaýly kúnderden beri qazaq kóshine toqtaý salyndy. «Kóshten qalmaıyq, kóshti toqtatpaıyq!» degen uranymyzdy estir qulaq bolmady. Bireýi shaı, bireýi nan ákelip, bir dastarhannyń basynan tabylatyn qazaqy ádetimizge salyp, «Qamshyny» qaıta qolǵa aldyq. Maqsat bireý – álemdegi bar qazaqtyń pikirin bir arnaǵa toǵystyryp, Alty alashtyń joǵyn joqtap, muńyn muńdaý. Úsh qaripte úkilep otyrýymyzdyń da syry sonda. Bir jarym mıllıon qandasymyz qoldanatyn tóte jazý da bizdiń saıtta tur. Ony tehnıkasynyń qıyndyǵyna qaramastan, Qytaıda turatyn qandasymyz Jánibek Sherıazdanuly órimge qosty. Eń úlken jańalyǵymyz sol – «Qamshyger» habaryn ashtyq. Birinshi suhbatymyzdy aty ańyzǵa aınalǵan Qajyǵumar Shabdanulynyń tuıaǵynan (http://abai.kz/node/16962) bastadyq. Tarıhyn qazyp, tanytýǵa tıis, bilimin baǵalap, usynýǵa tıis, aıtary bar azamattardy biz qaı-qashanda qushaq jaıyp qarsy alyp, qolyna qamshy ustatýǵa daıynbyz. Shaǵyn ǵana «alǵy sózimizde» saıttyń qaıta túleýine muryndyq bolǵan azamattardy tizip shyǵý múmkin emes. Alla qalasa qazaqtyń tól jańa jyly naýyryzda “Jezbuıda” jastar uıymymen birlesip, “Qamshyǵa” bastan-aıaq qoldaý kórsetken azamattardyń atyn atyp, túsin tústep, nuryn tasytý oıymyzda bar. Albasty qabaqqa qaraı basatyn mynaý zamanda ár qazaqtyń qolynda «Qamshysy» bolsyn dep tileıik! Óıtkeni ol ul bolsań qolyńda oınaıdy, qul bolsań tóbeńde oınaıdy!