Búgin májilis tóraǵasy Nurlan Nyǵmatýlın Ázerbaıjan Respýblıkasynyń Qazaqstandaǵy tótenshe jáne ókiletti elshisi Rashad Mammadovty qabyldady.
Taraptar eki el arasyndaǵy yntymaqtastyqty damytý tóńireginde ortaq oılarymen bólisti.
Sondaı-aq, kezdesýde Qazaqstan men Ázerbaıjan arasyndaǵy áriptestikke qatysty birqatar máseleler talqylanyp, palata spıkeri elshige eki el qarym-qatynasyn, sonyń ishinde, parlamentaralyq baılanysty nyǵaıtýǵa zor úles qosqanyn atap ótti.
Palata tóraǵasy Qazaqstannyń tuńǵysh prezıdenti, Elbasy Nursultan Nazarbaev elder arasyndaǵy baýyrlastyq qarym-qatynastardy nyǵaıtýǵa kúsh salyp, Ázerbaıjanmen ózara baılanystyń erekshe mańyzdylyǵyna nazar aýdaratynyn aıtty.
Sonymen qatar, Nurlan Nyǵmatýlın Ázerbaıjan Qazaqstanmen strategıalyq seriktes el ǵana emes, baýyrlas memleket ekenin, búginde memleket basshysy Qasym-Jomart Toqaevtyń Bakýmen yntymaqtastyqqa erekshe mán beretinin alǵa tartty.
Óz kezeginde mártebeli meıman Qazaqstanmen barlyq salada áriptestik ornatyp, parlamentaralyq ózara is-qımyldy jandandyryp, sondaı-aq, saýda-ekonomıkalyq qatynastyń berik negizi qalanǵanyna toqtaldy.
Nurlan Nyǵmatýlın men Rashad Mammadov parlamentaralyq dıalogty nyǵaıtý Qazaqstan men Ázerbaıjan arasyndaǵy ózara tıimdi yntymaqtastyqty damytýǵa yqpal etetinine senim bildirdi.
Májilistiń baspasóz qyzmeti
