Bıyl Qazaqstan men Japonıa arasyndaǵy dıplomatıalyq qatynastardyń ornaǵanyna 30 jyl toldy. Osynyń qurmetine 7 jeltoqsanda Ál-Farabı kitaphanasynda Qazaq Ulttyq ýnıversıtetiniń túlegi, Evrazıa Jazýshylar Odaǵy, Japonıa Fólklorıster asosıasıasy men Tokıodaǵy Japonıa-Evrazıa uıymy quramyndaǵy «Jastar komıtetiniń» múshesi Sharafat Jylqybaevanyń eńbekteri boıynsha «Kúnshyǵys ańyzdary»  dep atalatyn kórme  ashyldy.

Kórmeniń ashylýynda Japonıa Qorynyń ókili Ide Goheı sóz sóıledi.

«Sharafat san osy ýaqytqa deıin túpnusqadan aýdarǵan ártúrli prozalyq týyndylar, kileń Japonıada eń ataqty, halyq súıip oqıtyn jazýshylardyń shyǵarmalary bolyp tabylady. Sondaı týyndylardyń qazaq tiline aýdarylýy, Qazaqstan azamattary óz tilinde japon ádebıetimen tanysa alýy, men japonnyń bir balasy retinde rızamyn. Sharafat sannyń japon mádenıeti men ádebıetine sińirgen eńbegine, Japonıa azamaty retinde alǵys aıtqym keledi. Sharafat sannyń mereıli belesterimen quttyqtaı otyryp, budan ári de Japonıa men Qazaqstandy baılanystyrýda zor eńbek etedi dep úmittenemin» deı kele, sheteldik meıman «Qazaqstan men Japonıanyń mádenı-rýhanı baılanysy odan saıyn damı bersin» degen tilegin jetkizdi.

Odan soń tanymal ónerpaz Aıtmurat Tóreǵalı japonnyń shámısen aspabynda oınap, mýzykalyq shashý shashty.  

Aqbópe Sıkınbaeva bastaǵan kitaphana ujymy kórmege yjdahatty daıyndalǵany kórinip tur.

Ádebı-pýblısıstıkalyq shyǵarmalar qoıylǵan kórme «Japon óneriniń bastaýlary jáne kóshpendiler mádenıeti», «Qazaqstan jáne Japonıa: Jarqyn bolashaqqa ortaq kózqaras», «Japon prozasy – qazaq tilinde» dep atalatyn úsh bólimnen turady. Kórmeni jurtshylyqqa Ál-Farabı kitaphanasy Aqparattyq qyzmet basqarmasynyń basshysy Aqmaral Jamankózeva tanystyrdy.

Kórmeniń 1-bóliminde Sh.Jylqybaevanyń ejelgi japon mádenıeti, ádebıeti men baıyrǵy tili týraly jazǵan shyǵarmalary usynyldy. Bul bólimde fólklortanýshynyń mynandaı eńbekteri qoıylǵan: «Qyzyl qaqpanyń qupıasy», «Kók Bóriniń kózi» kitaptary jáne «Qazaq ádebıeti» gazetine jarıalanǵan «Kúnshyǵystaǵy jyraýlar poetıkasy», «Tama men Tana», «Ookamı – Kók Bóri. Japondardyń arhaıkalyq tegi týraly»,  «Saqtar, ǵundar jáne japondar», «Kóshpendilerdiń Edzo memleketi týraly», «Ana tili» tili gazetine jarıalanǵan «Gýnma», «Álem ádebıeti» jýrnalyna jarıalanǵan «Japon ańyzdary», t.b.

Kórmeniń 2-bólimi Sh.Jylqybaevanyń Qazaqstan men Japonıanyń mádenı, ádebı, ekonomıkalyq, t.b. salalar boıynsha yntymaqtastyq jolynda asqan asýlary beınelengen maqalalary men suhbattary jarıalanǵan gazet-jýrnaldar qoıylǵan. Bul bólimnen «Qazaqstan-Japonıa yntymaqtastyǵyna 25 jyl» («Egemen Qazaqstan»), «Samýraıdyń urpaǵy ekenimdi maqtan tutamyn» («Qazaq ádebıeti»), «Balany ana tilinde tárbıeleý ár áıeldiń mindeti» («Qazaq ádebıeti»), «Jazýshynyń jan-dúnıesi» («Qazaq ádebıeti»), «Hıroshıma men Semeı júregimniń túkpirinde turady» («Túrkistan»), «At ústindegi qazaq aıbarly kórinedi eken» («Ana tili»), t.b. maqalalary oryn alǵan.

Úshinshi bólimge Sh.Jylqybaeva japon tilinen aýdaryp jarıalaǵan «Saıgo Takamorı» (Akýtagava Rúnoske, «Juldyz» jýrnaly), «Órmekshiniń jibi» (Akýtagava Rúnoske, «Jas Alash»), «Tándegi tańba» (Tanıdzakı Djúnıchıroý, «Qazaq ádebıeti»), «Aın ańyzdary» («Úrker» jýrnaly), «Araq qurty» (Akýtagava Rúnoske, «Jas Alash»), «Bir sabaq júzim» (Arıshıma Takeo, «Aqjelken»), t.b. shyǵarmalar, «Kúnshyǵys ańyzdary» kitaby qoıylǵan. Bul kúni oqyrmandar kitaphana qorynda kóp jyldan beri saqtaýly turǵan Japonıa týraly ártúrli tilde jaryq kórgen kitaptarmen de tanysty.

Bul kórmede sondaı-aq, japon gazet-jýrnaldaryna jarıalanǵan Sharafat Jylqybaevanyń Qazaqstan týraly eńbekteri jurtshylyq nazaryna usynyldy. Kórmeniń ashylýynda japontanýshy ǵalym Ál-Farabı kitaphanasyna 2021 jyly shyqqan «Kók Bóriniń kózi» dep atalatyn kitabynyń (1 tom) 10 danasyn tartý etti.

Óz tilshimizden