«AMANAT» tóraǵasy Erlan Qoshanov partıanyń qazirgi jumysy jáne aldaǵy saılaý naýqanyna daıyndyq barysy týraly keńes ótkizdi. İs-sharaǵa ortalyq apparat qyzmetkerleri, belsendiler men óńirlik fılıaldardyń basshylyǵy qatysty.

Erlan Qoshanov aldymen partıalyqtardy tyńdap, aldaǵy saılaý naýqanyna daıyndyq máselesi boıynsha birqatar mindet júktedi.

«Bul saılaýǵa «AMANAT» úlken daıyndyqpen, zor senimmen bara jatyr. Kóp jumys atqarylýda. Bizdiń múmkindigimiz mol. Aqparattyq jáne kadrlyq resýrsymyz jetkilikti. Qalyptasqan dástúrli elektoratymyz, úlken tájirıbemiz bar. Endigi mindet – jumysty durys uıymdastyryp, qoǵamdy ortaq maqsat jolynda jumyldyrý! Partıa eldegi júrgizilip jatqan reformalardyń aldyńǵy shebinde bolýy kerek. Bul – bizdiń basty maqsatymyz», – dedi Erlan Qoshanov.

Atqarýshy hatshy Elnur Beısenbaev óz baıandamasynda búgingi kúni májilis pen máslıhattarǵa kandıdattardyń tizimin jasaý jáne 7 aqpanda Astana qalasynda ótetin partıa Sezine daıyndyq júrgizilip jatqanyn atap ótti.

Partıanyń saılaýaldy baǵdarlamasyn júzege asyrý qorytyndylary týraly VII saılanǵan májilistegi partıa fraksıasynyń depýtaty Ekaterına Smyshláeva habarlady.

«Eki jyl ishinde 5 jylǵa qoıylǵan mindetterdiń úshten biri tolyq kólemde oryndaldy. Tabıǵı gazben 140 eldi meken qamtamasyz etildi, 8,4 myń shaqyrym jergilikti jol jóndeldi, aýyz sýmen qamtamasyz etý boıynsha 200-den astam joba iske asyryldy. 84 myń orynǵa laıyqtalǵan mektepke deıingi uıymdar ashylyp, ondaǵy kezek tolyq avtomattandyryldy. Jalpy, Májiliste kóterilgen barlyq zań jobalarynyń 99%-y – «AMANAT» partıasy fraksıasynyń bastamalary», – dedi eks-májilismen.

Sondaı-aq, partıanyń saılaýaldy ýádelerin oryndaý aıasynda 200 myńnan astam oqýshy ornyna arnalǵan 502 mektep salyndy. Buǵan qosa, monoqalalarda, aýdan ortalyqtarynda jáne aýyldarda 2 myńnan astam mektep jańǵyrtyldy. Joǵary oqý oryndary men kolejderdiń 20 myńnan astam stýdenti jataqhanaǵa ornalasty.

Óz kezeginde, partıa hatshysy Eldar Jumaǵazıev «Aýyl amanaty» jobasynyń aralyq qorytyndysyn jasady. Ol partıanyń barlyq fılıaly atalǵan jobany júzege asyrýǵa baǵdarlanǵanyn aıryqsha atap ótti.

«Prezıdenttiń Saılaýaldy baǵdarlamasy aıasynda «Aýyl amanaty» jobasy iske qosyldy. Jergilikti atqarýshy organdarmen birlesip elimizdiń barlyq óńirinde 300 qanatqaqty aýyldyq okrýg tańdap alyndy. Bıyl respýblıkalyq búdjetten osy maqsatta 52,4 mlrd teńge bólindi», – dedi Eldar Jumaǵazıev.

Partıa múshesi, belgili zańger Baqytjan Bazarbek «Jer amanaty» komısıasynyń qyzmeti jóninde aıtty.

«Komısıanyń aralasýymen aýyl sharýashylyǵy maqsatyndaǵy 3,2 mln gektar jer memleket menshigine qaıtaryldy. Komısıanyń bastamasymen Aýyl sharýashylyǵy mınıstrligi ózge de memlekettik organdarmen birge qaıtarylǵan jerlerdiń ınteraktıvti kartasyn ázirledi. Sondaı-aq, komısıa jumys barysynda el aýmaǵyndaǵy 3000-ǵa jýyq úleskerdiń quqyǵyn qorǵady», - dedi ol.

Quqyq qorǵaýshy Abzal Quspan keńeske qatysýshylardy Atyraý oblysynda qanatqaqty joba retinde qolǵa alynǵan «Quqyqtyq kómek» partıalyq bastamasy týraly habardar etti.

«Birinshi kezekte biz aýyldyq jerlerdegi halyqqa keńes berdik. Sebebi quqyqtyq sıpattaǵy máselelerdi sheshý kezinde qala turǵyndarynyń múmkindigi kóbirek. Atyraý oblysynyń ártúrli aýdandarynda barlyǵy 100-den astam adam qabyldandy. Azamattardy alıment tóleý, turǵyn úıdi jekeshelendirý, eńbek daýlary máseleleri tolǵandyrady», - dedi ol.

Keńeske qatysýshylarǵa partıanyń Atyraý oblystyq fılıalynda iske qosylǵan «AMANAT Service» qanatqaqty jobasynyń nátıjesi jáne aldaǵy ýaqytta «AMANAT»-tyń qoldaýymen ótetin áıelder forýmyna daıyndyq jumysy týraly málimet berildi.

«AMANAT» partıasynyń baspasóz qyzmeti