Jýyrda Qamshy portaly respýblıkalyq mańyzy bar qalalar men oblys ákimderiniń arasynda «Qaı ákim halyqqa jaqyn?» degen ataýmen saýalnama júrgizgen. Endi ár aımaq ákimderiniń turǵyndarmen jumysyn baǵalaý, baǵamdaý maqsatynda olardy "Eski Qazaqstan" shendilerimen salystyryp kórmekpiz.

Oblys ákimderi arasyndaǵy saýalnama el ekonomıkasy úshin basty donor aımaqtardyń biri  – Atyraý oblysynan bastalady. Munaıly óńirdi táýelsizdikten beri onǵa tarta adam basqarǵan. Olardyń ishinde jumys isteý tásilimen, iskerligimen kóptiń yqylasyna bólengen ákimder de, buqaramen isi joq, kabınetinen shyqpaıtyn sheneýnikter de boldy. Aımaqqa keıin esimi respýblıkaǵa tanymal bolǵan tulǵalar da, jergilikti deńgeıde qalyp qoıǵan azamattar da jetekshilik etti. Sol onǵa jýyq basshynyń arasynda ásirese Imanǵalı Tasmaǵambetov, Aslan Mýsın, Bergeı Rysqalıevtyń aty áli kúnge jurt jadynda.

Al búginde Atyraý oblysyna Serik Shápkenov ákim bolyp otyr. Qala ákimi, vıse-mınıstr, oblys ákiminiń orynbasary laýazymdaryn atqaryp, birshama tájirıbe jınaǵan. Qazirgi qyzmetine kiriskenine de kóp bolmady. Dese de jylǵa jýyq ýaqytta eldi eleń etkizerlikteı isimen, bastamasymen kózge túse qoımady. Serik Shápkenov qatardaǵy kóp ákimniń biri bolyp qala ma, álde aımaqty alǵa súıregen menedjer, memleket deńgeıindegi iri saıasatkerge aınala ma, ol jaǵyn ýaqyt kórsete jatyr. Deıturǵynmen alǵashqy isteri men sheshimderinen-aq ákimniń qandaı bolaryn ańǵarýǵa bolady. Oǵan baǵa berýdi oqyrman enshisine qaldyrdyq.