Kúni keshe Muhtar Áýezov atyndaǵy Qazaq ulttyq drama teatrynda “Qozy Kórpesh – Baıan Sulý” qoıylymynyń premerasy boldy. Atalǵan qoıylym 15 sáýir ǵashyqtar kúniniń qarsańynda tusaýy kesildi.

Ǵashyqtar zaryna tas kereń ǵasyrda dúnıege kelip, jaqyn-jýyqtarynan qoldaý tappaı, baqıǵa attanyp kete barǵan qos muńlyqtyń mahabbat oqıǵasyn uly qalamger Ǵabıt Músirepov kezinde óz pesasyna ózek etken edi. 1940 jyldyń 29 sáýirinde Muhtar Áýezov atyndaǵy Qazaq memlekettik akademıalyq drama teatrynda alǵash ret kórermen nazaryna usynylǵan týyndy búgingi kúnge deıin úlken suranysqa ıe.

Spektákldiń qoıýshy rejısery – Qazaqstannyń  eńbek sińirgen óner qaıratkeri Áýbákir Rahımov. Qozynyń rólin somdaǵan – teatrdyń jas ári jalyndy aktery Maǵjan Asaýbaı. Baıannyń rólinde – tanymal aktrısa Indıra Qulmaǵanbetova. Teatr dırektory Erkin Jýasbek “Qozy Kórpesh – Baıan Sulý” M.Áýezov sahnasynda besinshi ret ómirge kelgenin aıtyp, bul qoıylym burynǵydan ózgerek ekenin jetkizdi.

Jańa tehnologıa jaryqtarymen túsirilgen sahnalyq sýretter, óte baı kolorıttegi kıimder, keıipkerlerdiń túrli kaskaderlik qımyldary arqyly ózindik dınamıkasyn tanytqan qoıylymdy kórermen erekshe tolǵanyspen qabyldap, akterlik quramǵa qoshemet bildirdi.

Teatr akteri Ǵanı Quljanov qoıylymdaǵy qos ǵashyqtyń kirshiksiz mahabbaty materıalızm keń etek alǵan qazirgi zamanda eseppen úılenetin jastarǵa úlgi bolatynyn aıta ketti. Al qoıýshy rejıser Áýbákir Rahımov “Qozy Kórpesh – Baıan Sulý” shyǵarmasy týraly tyń derekterdi bólisti

– “Qozy Kórpesh – Baıan Culý” poemasynyń 21 nusqasy jınalǵan, al jınalmaı qalǵany qansha? Bul shyǵarmaǵa Pýshkın de qyzyǵyp, jazbaqshy bolǵan. Orystyń talaı zertteýshileri óz jazbalaryna túsirgen. Al biz kóp dúnıelerdi kezinde jınaı almaı qaldyq. Mysaly, Janaq aqynnyń Qozy Kórpesh – Baıan sulý týraly kóptegen nusqasy bar, biraq onyń bir-ekeýi ǵana bizge jetken. Bul nusqalar ártúrli sheshimderimen erekshelenedi. Birde Qozy úsh kúnnen keıin tiriledi, úsh kún ómir súrip, o dúnıege attanady. Bir nusqasynda Qozy qaıta tirilip, Baıanmen shańyraq kóterip, bala-shaǵaly bolady. Bunyń barlyǵy neden? Árıne halyqtyń armany, qos ǵashyqtyń taǵdyryna degen tilegi, olardy ólimge qımaýynan týǵan. Osyndaı jaýharlarymyzdy jas urpaq bilse eken deımiz. Osyny maqsat etip akterlik quramdy da kil myqty jastardan quradyq, – deıdi Áýbákir Rahımov.