Memleket basshysy Qasym-Jomart Toqaev osydan bir jyl burynǵy Qazaqstan halqyna Joldaýynda balalardyń qaýipsizdigin qamtamasyz etý men olarǵa sapaly bilim berýde Oqý-aǵartý mınıstrligine birqatar tapsyrma bergen bolatyn. Prezıdenttiń qandaı tapsyrmasy bir jyldyń ishinde júzege asty. Joldaýdaǵy aıtylǵan tapsyrmalar qalaı oryndaldy? Aıtylǵan sóz júzege asty ma? Qamshy.kz aqparat agenttigi osy suraqtyń jaýabyn izdep kórdi. 

Zorlyq-zombylyq qurbanyn qorǵaý

Aıtyldy:

Memleket basshysy Qasym-Jomart Toqaev 2023 jylǵy 1 qyrkúıektegi «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda zorlyq-zombylyq pen býllıng qurbandaryna pármendi kómek baǵdarlamasyn ázirleýdi tapsyrdy.

Oryndaldy:

1) Oqý-aǵartý mınıstrligi zorlyq-zombylyqqa, qatygezdikpen qaraýǵa, býllıngke ushyraǵan kámeletke tolmaǵandarǵa, sondaı-aq olardyń kózinshe jeke adamǵa qarsy quqyq buzýshylyqtar jasalǵan kámeletke tolmaǵandarǵa kómek kórsetý baǵdarlamasyn ázirledi, oǵan balalarǵa kómek kórsetý algorıtmi, sondaı-aq kámeletke tolmaǵandardyń qajettilikterin baǵalaý negizinde kózdelgen kómek túrleriniń kesheni (medısınalyq, psıhologıalyq, pedagogıkalyq, áleýmettik, quqyqtyq) kiredi.

2) Psıhologıalyq kómek kórsetýdiń erekshelikterin eskere otyryp, zorlyq-zombylyqqa ushyraǵan nemese kýá bolǵan kámeletke tolmaǵandardy erte anyqtaý jáne olarǵa kómek kórsetý boıynsha ádistemelik usynymdar ázirlendi.

 «Sıfrlyq muǵalim» jobasy

Aıtyldy:

Prezıdent áleýmettik osal otbasylardan shyqqan balalarǵa arnalǵan «Sıfrlyq muǵalim» jobasyn iske asyrýdy tapsyrdy.

Oryndaldy:

bilim berý uıymdarynda 2024 jyldyń qyrkúıeginde «Sıfrlyq muǵalim» jańa jobasy bastalady; 
- bul joba áleýmettik osal toptardan shyqqan oqýshylarǵa qorytyndy emtıhandarǵa daıyndalýda qoldaý kórsetýge baǵyttalǵan; ⁠
- oqýshylarǵa sıfrlyq oqý materıaldary men qosymsha sabaqtarǵa qoljetimdilik beriledi;
- osy maqsatta áleýmettik osal otbasylardan shyqqan balalarǵa arnalǵan «Sıfrlyq muǵalim» jobasyn iske asyrý boıynsha Jol kartasy ázirlendi;
- joba boıynsha el aýmaǵynda 2000-ge jýyq oqýshy qamtylady.

Mektepke deıingi tárbıege mán berilý kerek

Aıtyldy:

Memleket basshysy 2 jastan 6 jasqa deıingi balalardy sapaly mektepke deıingi tárbıemen jáne oqytýmen qamtamasyz etý jóninde sharalar keshenin qabyldaýdy tapsyrdy.

Oryndaldy:

- mektepke deıingi bilim berý uıymdarynda bıyldyń basynan beri 27 myńǵa jýyq jańa oryn ashyldy;
- mektepke deıingi uıymdarǵa barmaıtyn balalardyń ata-analaryna arnalǵan konsýltasıalyq pýnktter jelisi keńeıtilýde, 2024 jyldyń sońyna deıin olardyń sany 5000-ǵa jetedi;
- mektepke deıingi uıymdar men bastaýysh mekteptiń jumysyndaǵy sabaqtastyqty qamtamasyz etý maqsatynda balanyń jeke damý kartasy sıfrlyq formatqa kóshirildi jáne bastaýysh synyp muǵalimderine UBDQ bazasynda qoljetimdi bolady.  

Mektep sanyn arttyrý 

Aıtyldy:

Prezıdent Qasym-Jomart Toqaev shaǵyn qalalardaǵy, aýdan ortalyqtary men aýyldardaǵy mektepterdi jyl saıyn jańǵyrtýdy (kúrdeli jáne aǵymdaǵy jóndeý, kitaphanalar, asqanalar, jıhaz, qaýipsizdik máselesi) tapsyrdy.

Oryndaldy:

Shaǵyn qalalarda, aýdan ortalyqtarynda jáne elimizdiń 17 óńiriniń aýyldarynda ornalasqan 1000 mektepti jańǵyrtýǵa jergilikti búdjetten 68 mlrd. teńge bólindi. Onda 367 myńǵa jýyq oqýshy oqıdy.

Shaǵyn qalalar men aýyldardyń 1000 mektebin jańǵyrtý kelesi baǵyttar boıynsha josparlanýda: 
- 706 mektepte kúrdeli jáne aǵymdaǵy jóndeý jumystary; 
- 526 mektepti pándik kabınettermen jaraqtandyrý; 
- 537 mektepte mektep jıhazyn jańartý; 
- 442 mekteptegi asqanalardy jańǵyrtý; 
- 670 mektepte kitaphanalardy jańartý; 
- 420 mektepte qaýipsizdik sharttaryn arttyrý.

Oqý materıaldaryn sıfrlyq formatqa kóshirý

Aıtyldy:

Prezıdent pánderdi oqytýdyń ınovasıalyq tásilderin engizý, qajetti oqý materıaldaryn sıfrlyq formatqa kóshirýdi tapsyrdy.

Oryndaldy:

Búgingi tańda mektep oqýlyqtarynyń 95,5%-y sıfrlyq formatqa aýystyryldy. Olar memlekettik saraptamadan ótip, oqý-ádistemelik keshender tizimine engizildi. Sandyq formattaǵy oqýlyqtar elimizdegi 13 baspanyń 11 platformasynda qol jetimdi.

Qazaqstan Respýblıkasy Prezıdentiniń saılaýaldy baǵdarlamasyn iske asyrý barysynda 2023 jyly 1507 pándik kabınet satyp alynyp, jospardyń oryndalýy 100%-ǵa jetti.

2024 jyly elimizdiń 700-den astam mektebinde 1206 zamanaýı robototehnıka, hımıa, bıologıa, fızıka, STEM pándik kabınetterin ashý josparlanǵan.