Shymkentte kásipkerler "Qıal álemi" saıabaǵyn súrýge qarsy shyqty

Shymkentte kásipkerler "Qıal álemi" saıabaǵyn súrýge qarsylyq tanytyp, jumysshylar men aýyr tehnıkanyń jumysyna kedergi keltirdi. Oqıǵa ornynda jaǵdaı ýshyǵyp, polısıa shaqyrýǵa týra keldi.

Kásipkerler demalys ornynda ondaǵan jyl boıy tabys taýyp kelgenderin aıtyp, súrý jumystaryna ýaqytsha kidiris berýdi suraıdy. Aıtýlarynsha, jańa orynǵa kóshý úshin ýaqyt pen qarajat qajet.

– "Endi jer bersin. Jer bergen soń ýaqyt bersin. Sebebi bizge ony qurastyrý úshin qarajat kerek. Biz osy jerde jumys istep, tabys taýyp, jańa oryndy qurastyrǵymyz keledi", – deıdi kásipker Aıman Áshirbaeva.

Kásipkerler 4 gektar jerdi 49 jylǵa jalǵa alǵandaryn, al kelisim merziminiń aıaqtalýyna áli 19 jyl bar ekenin aıtady. Alaıda qala ákimdigi bul jer zańsyz paıdalanylǵan dep, sotqa júginip, jeńiske jetken. Sheshimge sáıkes, saıabaqtaǵy 30-ǵa jýyq nysan buzylýy tıis.

– "Nesıem bar, osy maýsymda jartysyn jabamyn degen úmitim bolǵan. Biraq josparymnyń bári bir kúnde qıratylyp otyr", – deıdi kásipker Sholpan Turbaeva.

Qala ákimdiginiń málimdeýinshe, atraksıondar zańsyz salynǵan. Saıabaqtyń aýmaǵy qoǵamdyq demalys orny retinde qaıta jańǵyrtylmaq.

– "Basynda durys berilmegen. Sot sheshimi bar. Bul jerde halyqqa arnalǵan saıabaq bolady. Qujaty bar 9 nysannyń syrtynda qalǵandarynyń eshqaısysy zańdastyrylmaǵan", – dedi Shymkent qalalyq orta sapasy jáne baqylaý basqarmasynyń basshysy Merlan Kerimjanov.

Qazirgi tańda saıabaqta 300-ge jýyq adam jumys isteıdi. Jospar boıynsha, zańsyz dep tanylǵan 30 nysan súrilýi tıis. Alaıda kásipkerlerdiń narazylyǵynan keıin tek bir ǵana nysannyń buryshy buzylyp, jumys ýaqytsha toqtady.