AIF-2025 forýmynda sóılegen sózinde Prezıdent Qasym-Jomart Toqaev jahandyq qaýipsizdikke tek geosaıası turǵydan qaraý jetkiliksiz ekenin atap ótti. Onyń aıtýynsha, álemdegi jaǵdaı túbegeıli ózgerip jatyr: mýltılateralızm álsirep, proteksıonızm kúsheıip keledi.
– Osyndaı beıbereket kezeńde bizdiń mindetimiz – yntymaqty saqtaý, ydyraǵan tustardy qalpyna keltirý, – dedi Memleket basshysy.
Toqaev Qazaqstan qazirgi kúrdeli ahýaldy syndarly yqpaldastyq arqyly sheshýge umtylatynyn málimdedi.
– Syrtqy saıasatta biz jikke bólinbeı, dıalogty tańdaýdy jáne barlyq elderdiń egemendigin qurmetteýdi basty ustanym etip kelemiz. Ásireultshyldyqqa, ózge halyqtardyń tarıhy men mádenıetin mensinbeýge jol berilmeıdi. Ár halyqtyń ana tili men mádenıetin qurmetteý – basty qaǵıdat. Sondyqtan Qazaqstanda "Birligimiz – áralýandyqta" qaǵıdasy qatań saqtalady, – dedi ol.
Aıta keteıik, AIF-2025 forýmy Astanada ótip jatyr. Prezıdent Toqaev bul is-sharanyń álemde belgisizdik kúsheıip turǵan kezeńde ótip otyrǵanyna jáne Qazaqstannyń áli kúnge deıin 450 ıadrolyq synaqtyń zardabyn tartyp otyrǵanyna nazar aýdardy.
