Almaty ákimdigi shaharda bes negizgi polıortalyq qurýdy josparlap otyr.

"Almatybasjospar" mekemesi qalada bes negizgi polıortalyq – zamanaýı qoǵamdyq-iskerlik klasterlerdi qalyptastyrý jobasyn usyndy. Bul bastama iskerlik belsendilikti qaıta bólýge, qalanyń ortalyq aýdandaryna túsetin júktemeni azaıtýǵa jáne megapolıs aıasynda ósýdiń tolyqqandy núktelerin qurýǵa baǵyttalǵan.

Atalǵan sharalar Almatyny damytý baǵdarlamasy men 2040 jylǵa deıingi bas jospar aıasynda júzege asyrylady. Qala monoortalyqty damý úlgisinen polıortalyqty júıege kóshýge bet burmaq.

Almatyda bes negizgi polıortalyq qurylady:

"Soltústik" polıortalyǵy Almaty-1 temirjol stansıasy mańynda qurylady. Munda qyzmet kórsetý salasyn damytý josparlanǵan. Ǵımarattardyń birinshi qabattary shaǵyn bızneske jalǵa beriledi. Sonymen qatar Úlken Almaty kanaly men Baým toǵaıy boıynda skverler men demalys oryndary qarastyrylǵan.

"Batys" polıortalyǵy jańa Almaty-3 temirjol vokzaly men Boraldaı kentindegi kólik haby aýmaǵynda ornalasady. Bul jerde etnografıalyq "Saq qorǵandary" parki aınalasynda barlyq qajetti ınfraqurylym tartylady. 90 gektar aýmaqty qamtıtyn jelilik rekreasıalyq saıabaq, jańa kópsalaly aýrýhana kesheni jáne basqa da nysandar salý josparlanyp otyr.

"Ońtústik-batys" polıortalyǵy Raıymbek dańǵyly men Alataý kóshesi (josparlanǵan jańa kóshe) qıylysynda ornalasady. Bul aımaqta óndiristik mını-parkter, saýda jáne logıstıkalyq nysandar, ákimshilik-iskerlik ortalyqtar ornalastyrylmaq.

"Tarıhı ortalyq" — Medeý aýdanynyń bir bóligi, ıaǵnı "altyn sharshy" dep atalatyn aımaq: Baıtursynov kóshesi – Abaı dańǵyly – Zenkov kóshesi – Jibek Joly kóshesi shekarasynda ornalasqan. Bul aýmaqta óndiristik kásiporyndar qarastyrylmaǵan. Tarıhı jáne mádenı mańyzy bar ǵımarattar qaıta jóndelip, qalpyna keltiriledi.

"Shyǵys qaqpa" polıortalyǵy — Talǵar jáne Qulja tas joldarynyń qıylysyndaǵy aýmaq. Bul jerde Almatynyń logıstıkalyq haby ornalaspaq.