Almaty oblysynyń prokýratýrasy 2024 jyldyń 4 qazany kúni adam qolynan qaza tapqan 16 jastaǵy Sherzat Bolattyń ólimine qatysty málimdeme jasady.
Aıta keteıik, 7 qazanda balanyń ákesi áleýmettik jeli arqyly Bas prokýror Berik Asylovqa úndeý jasap, jergilikti quqyq qorǵaý organdary tergeýde zań buzyp otyr degen edi. Búgin oblystyq prokýratýra istiń obektıvti túrde tergeletinine kepildik berdi.

"Ózderińiz biletindeı, bıyl 4 qazanda Talǵar qalasynda tóbeles oryn alyp, qalanyń 16 jastaǵy turǵyny pyshaqtalyp qaza boldy. Taǵy eki azamat aýyr jaraqat aldy. Biz qoǵamnyń tolqýyn túsinemiz jáne balanyń otbasyna kóńil aıtamyz. Prokýratýra organdary kisi óltirý bul isti erekshe baqylaýyna alǵanyn resmı túrde málimdeımiz", – dep jazylǵan prokýratýranyń aqparatynda. 

Derekkóz boıynsha, osy qylmysty jasady degen kúdik boıynsha sot jeti adamdy 2 aı merzimge qamaǵan. 

"Biz jaǵdaıdy tolyq anyqtap, kinálilerdiń bárin jaýapqa tartatyndaı obektıvti tergeý júretinine kepildik beremiz. Osy qylmysqa qatysy bar adamdardy jaýapkershilikten bosatatyndaı eshqandaı áreket bolmaıtynyna sendiremiz. Tergeýge kómektesetin aqparat bilseńiz, prokýratýra nemese ishki ister organdaryna júginýge shaqyramyz", – delingen habarlamada.