Málimetterge sensek, taýarlardy Reseı aýmaǵy arqyly tranzıtpen tasymaldaýǵa ruqsat etilgen. Biraq ol úshin taýarlarǵa sońǵy elge jiberiletin fıtosanıtarlyq sertıfıkatty rásimdeý qajet jáne astyqty vagonnan tikeleı keme trúmderine tıeý kerek.

Qazaqstannan qyzanaq, burysh, kúnbaǵys tuqymdary men qaýyndardy tikeleı tranzıtpen jetkizýge de tolyqtaı tyıym salynǵan.

16 qazanda májilis depýtattary Reseıdiń osyndaı sharalary 25 mıllıon tonna astyqtyń buzylýyna alyp kelýi múmkin ekenin atap ótti. Sonymen qatar halyqaralyq kelisimderdiń buzylýyna nazar aýdardy. Parlament músheleri bul máselege qatysty úkimetke birneshe usynyspen hat joldady.

Osy rette májilis depýtaty Aıdarbek Qojanazarov otandyq astyqtyń eksporty úshin Reseıden basqa logıstıkalyq baǵytty iske qosýdy usyndy.

"2024 jyldyń 23 qyrkúıeginen bastap Reseı Federasıasy Qazaqstannyń astyǵy men aýylsharýashylyǵy ónimderiniń Reseı aýmaǵy arqyly ótýine birjaqty shekteýler engizdi. Osy teris sheshimniń nátıjesinde astyqqa, dán ónimderine, kúnbaǵys tuqymyna, qyzanaq, burysh jáne basqa da ónimderge fıtosanıtarlyq sertıfıkat berý toqtatyldy. Halyqaralyq kelisimder jaıyna qaldy. Nátıjesinde osyndaı kedergiler bizdiń eldiń aýylsharýashylyǵy salasyna, jalpylaı alǵanda ekonomıkamyzǵa salmaq salyp otyr. Qazaqstandyq eksporttaýshylar úlken shyǵynǵa ushyrady, vagondar toqtap qaldy, ónimderdi jetkizý merzimi ótip jatyr", – dedi depýtat.