Mektep oqýlyqtarynan 700-den astam qate tabyldy. Aıda Balaeva kitaptardy kezeń-kezeńimen aýystyrý josparyn usyndy. Qazaqstandaǵy keıbir mektep kitaptarynyń jańartylmaǵanyna 9 jylǵa jýyqtaǵan. Osyǵan baılanysty Aıda Balaeva oqýlyqtarda qandaı qatelikter ketkenin jipke tizip, qaı synyptardyń quraldary birinshi kezekte qaıta basylatynyn jetkizdi.
Mádenıet jáne aqparat mınıstri mektepterge arnalǵan oqýlyqtar men ádistemelik quraldardy zaman talabyna saı ózgertý máselesin qozǵap, qazirgi kitaptardan 700-den asa eskertý men shıkilik tabylǵanyn alǵa tartty.
Mınıstrdiń sózinshe, sońǵy ýaqytta baspagerler men turǵyndar tarapynan bul reformanyń mán-jaıyn túsindirýdi suraǵan ótinishter jıilegen.
Aıda Balaeva óziniń Facebook paraqshasynda bylaı dep jazdy:
«Búginde qoldanystaǵy oqýlyqtar boıynsha ártúrli sıpattaǵy 700-den astam eskertpe men qate anyqtaldy. Olardyń qatarynda tehnıkalyq jáne stıldik kemshilikter, derektik qateler, mazmunǵa sáıkes kelmeıtin ılústrasıalar, jekelegen materıaldardyń oqý baǵdarlamalarymen úılespeýi, sondaı-aq eskirgen ádis-tásilder men tujyrymdamalardyń qoldanylýy bar».
Mınıstr otandyq qundylyqtarǵa saı kelmeıtin taqyryptardyń kezdesýine, matematıkadaǵy qate erejeler men esepterdiń sheshilý joldaryna, baǵdarlamadan tys shyǵarmalardyń júrýine jáne tarıhı faktilerdiń burmalanýyna qatty alańdaýshylyq bildirdi.
Sonymen qatar, Balaeva birqatar kitaptyń bekitilgen merzimnen tys, ıaǵnı toǵyz jyl boıy eshqandaı túzetýsiz qoldanysta júrgenin synǵa aldy.
«Mundaı jaǵdaıda oqýlyqtardy ýaqytyly jańartý – oqýshylardy sapaly, ózekti ári memlekettik bilim berý standarttaryna saı oqý materıaldarymen qamtamasyz etýdiń kezek kúttirmeıtin qajettiligi».
Oqýlyq sapasy tek baspalardyń ǵana sharýasy emes ekenin aıtqan mınıstr, bul máseleniń balalardyń bolashaǵy men bilim deńgeıine tikeleı áser etetinin eskertti.
«Bul eldegi bilim sapasyna, demek balalarymyzdyń keleshegine tikeleı yqpal etetin mańyzdy másele. Oqýlyq saraptamanyń formaldy talaptaryna ǵana saı bolyp qoımaı, memlekettiń, qoǵamnyń jáne bilim berý júıesiniń búgingi suranysyna tolyq jaýap berýi tıis».
Ol buǵan deıin maquldaýdan ótken kitaptarǵa qatysty Pándik saraptama komısıasy shyǵarǵan sheshimderdiń kúshinde qalatynyn naqtylady.
«Áńgime túpki nátıje úshin ortaq jaýapkershilik týraly bolyp otyr. Balanyń qolyna tıetin árbir oqýlyq sapaly, mazmuny dál, deregi shynaıy jáne ýaqyt talabyna saı bolýy kerek».
Oqýlyqtardy jańartý kestesi
Oqý-aǵartý mınıstrligi bul reformany birden emes, kezeń-kezeńimen júzege asyrýdy kózdep otyr:
- 2026 jylǵy 30 tamyzǵa deıin – 3 jáne 7-synyp oqýlyqtary;
- 2027 jylǵy 1 qańtarǵa deıin – 4 jáne 9-synyp oqýlyqtary;
- 2027 jylǵy 1 sáýirge deıin – 8-synyp oqýlyqtary tolyq jańartylady.
Resmı málimetke súıensek, negizgi maqsat – elimizdegi mektepterdi zamanaýı, mazmuny tekserilgen, «Adal azamat» biryńǵaı tárbıe baǵdarlamasynyń qundylyqtaryna negizdelgen sapaly kitaptarmen qamtý.
«Ata-analar da, ustazdar qaýymy da, jalpy qoǵam da bizden osy jaýapty jumysty sapaly ári júıeli atqarýdy kútedi». – dedi Aıda Balaeva.
Aıta keteıik, buǵan deıin Oqý-aǵartý mınıstri Juldyz Súleımenova da bıyl qaı synyptardyń basylymdary ózgeretinin habarlaǵan bolatyn.
