Asyq jaıly
Aýyl jaqty otyrmyn, dosym, oılap,
Tartyp keter edim-aı osy boıda-aq.
Jıyp qoıyp qalanyń sharýasyn,
Balalarmen júretin asyq oınap.
Ertip alyp bir-eki joldasymdy,
Topyraqqa malyp-ap qol-basymdy,
Aýyl jaqqa keter me-em saqamdy alyp,
Quıyp alyp ishine qorǵasyndy.
Qalada únem jatady sottasyp el,
Júrgendeımin adasyp jaqta osy men.
Atam da joq aýylda meni kútken,
Asyq arshyp otyrar shappasymen.
Asyq atqan alańsyz bal shaǵym-aı,
Ýaqytty artqa bireý kep, qalsa buraı.
Asyq kórsem, bul keýde, nege ekenin,
Aýylǵa aýyp turady ańsary udaı.
Bul qalanyń aqshaly kóp qýlary,
Talaı qýdan jeńilip, kettim ary.
Nadan kórsem alystan adamǵa úrgen,
Saqa bolyp atylǵym kep turady.
Adal bolyp qalý da qıyn mindet,
«Aram» kórip nesheme kúıindim kóp,
Qorǵansyz bop qorlanǵan keı asyqqa,
Qorǵasyn bop salmaqty quıylǵym kep...
Taǵa bersem qalaǵa min kóp óte,
Jaqsylary joq emes qurmet eter.
Qulja bolar, aýylda emespiz ǵoı,
Saqa bolý qalada mindet eken.
Bolmasty aıtyp tappaspyn ashyna túk,
Kóp sóıleýdi turǵam joq osy unatyp.
Ómir atty oıyndy qoıa turyp,
Oınaıyq kel, kishkene asyq atyp.
Boıdaqsyný
Osy neni jatady toılap kúnde el?
Degenimen, jaqsy ǵoı oınap-kúlgen!
Qyryq emes, qyryq myń qadam attap,
Qol ustasyp ketsem be boıdaq kúnmen?
Dúldilimin shapqanda báıgeniń men,
Bulbul únim shyrqasa aı kerilgen.
Murt demeseń, reńim bar ájepteýir,
Birjan saldan aıtshy osy, qaı jerim kem?
Baılyq ta joq, júretin shashyp qoldan,
Aılyq ta joq artylyp, tasyp tolǵan.
Ǵashyq bolsam otyzda aıyp pa eken,
Toqsanynda Jambyl da ǵashyq bolǵan?!
Jasyrǵanmen bola ma, o, táıiri,
Súrinbespin, sezimniń joq aıyly.
Mahabbattan kóshe almaı parasatqa,
Boıdaqsynǵan júrektiń sol aıyby.
Osy neni jatady toılap kúnde el?
Degenimen, jaqsy ǵoı oınap-kúlgen!
Báıbisheden jasyryn keshe, dosym,
Osyndaı bir bolmaıtyn oı baqtym men.
28jas
Neni jáne bilmedim, kimdi izdedim,
Jalǵyz janǵan tańdaǵy juldyz ba
edim.
Kúni me edim aqpannyń otyzynshy,
Enbeı qalǵan ishine kúntizbeniń.
Jalǵyz ekem qoryta bilgenim, tek,
Shaı quıyp júr janymda bir
kelinshek.
Jyr uqpaıtyn jandar da bolady
eken,
Birge jylap, bolmas pa ed birge kúlsek.
Peri me edim pende emes perishte me
em?
Syımaım keıde jurt syıǵan keńiske
men.
Bir táttini ańsaımyn – el ishpegen,
Bir tanysty kútemin – kórispegen.
Sheshiledi-aý jumbaǵym sońynda bar,
Kútkenim hám tabylyp, qolymdy
alar.
Mendik qıal qurǵaq oı, biraq senem,
Ýtopıa da keıde oryndalar.
Kimdi izdedim bilmedim, neni izdedim,
Tereńdigi beımálim teńiz be edim?
Áli qansha joq qýyp úmit qylam,
Búgin mine, jıyrma segizdemin.
ǴASHYQQA HAT
Qalaýyn tapsań janady qar da,
Adamnyń nıet, talaby barda.
Júrek jibiter taba almaı sózder,
Júdep júrgenim saǵan unarǵa.
Kótermes júkti arqalap netem,
Hat shyqpaı táýir ártarap ketem.
Oıymdy ózińe zergeri sózdiń,
Jetkizer me edi Marhabat(1) kókem.
Shabyttanyp qur, ýa, ne berem,
Poezıanyń da qulageri emen.
Atymnan saǵan Ábilda(2) kókem,
Jazyp berer me ed, bir ádemi óleń.
Jazǵandaryn jurt jaqut sanaǵan,
Qaıda júr osy Baqytjan(3) aǵam?
Ózińdi jyrlar shabytynan sál,
Bere tursa ǵoı ýaqytsha maǵan.
Qalaýyn tapsań jansa eger qaryń,
Sózderge tátti tapshy emen, bar ún.
Álemge seni máshhúr etetin,
Ózim-aq jazam jaqsy óleń, janym!
Qara da tur…
1) M. Baıǵut - jazýshy
2) Á. Aımaq - aqyn
3) B. Aldıar – aqyn
"Men... Ol..."
Men mensinbegem.
Ǵashyq bolsa aldyma kelsin degem.
Sulýlardy qos-qostan súıip júrip,
Serilerden ózimdi kemsinbegem.
Ol ǵashyq-tuǵyn.
Jeńe almaǵan boıdaǵy jasyqtyǵyn.
Jyrlarymdy jastanyp jatady eken,
Kónshimeıtin kóńildiń basyp qylyn.
Men qaramaǵam.
Eljiretip, júregin jaralaǵam.
Jaýabymdy bergen-em áspensinip,
Qurbysy ma, araǵa salǵanda adam.
Ol jylady, ras.
Basa almastan sezimniń qumaryn ash.
Ókine me jaı-kúıin bildirgenge,
Men bar jerde qyzaryp, turady pás.
Men menmen boppyn.
Oǵan asa eshbir mán bergen joqpyn.
Qyrandaıyn tákappar jerge túspeı,
Mekendeppin arasyn jer men kóktiń.
Ol boı da jetken.
Kúıip mendik aıamas oınap otpen.
Aınalama zer salsam jalǵyz ekem,
Janymdaǵy "sánqoılar" qaıda ketken?
Men qaldym jalǵyz.
Dáýreni ótken búginde salbyr janbyz.
Bar ma, joq pa, baıaǵy meni súıgen,
Úsh jas kishi balaýsa, baldyrǵan qyz.
Ol myń qystyǵyp,
Júr me deımin ózimdi qylmysty ǵyp.
Taptym izdep jaqynda, bári de bos,
Kórshi aýylǵa ketipti turmys quryp.
Men ókindim, ras...
Túngi qala
Túngi qala. Qyzyl, sary janǵan sham.
Kúz mezgili - keremet kez.
Ańǵarsań.
Tógip jatyr japyraǵyn taldar san.
Romantıka!
Osyndaıda Sen bolsań.
Túngi qala, kúzgi qala, Shymqala.
Kóshe kezip kele jatyr bir bala.
Sol balanyń kózi tústi Aıǵa anaý,
Seniń uqsap ketip kúmis syrǵańa.
Bul qalanyń jyly - qońyr kúzi de,
Jyly jáne meıirimdi júzi de.
Juldyzdary seniń móldir jasyńdaı,
Qýanyshtan jatqanynda úzile.
Japyraǵy qulaǵanda súıirleı,
Bılep túser seniń ásem bıińdeı.
Tek, taldary, kúzdiń myna kóńilciz,
Seni ansaǵan meniń jalań kúıimdeı.
Kúzdiń eshkim aıyra almas erkinen,
Japyraqtan toqyp jatyr jer kilem.
Myna jaryq kúzgi túnge qarasam,
Saǵynyshym, Seni kórem kórkinen.
Sary japyraq
Sary japyraq – sarǵaıǵan júrek,
Kelgendeı ushyp shalǵaıdan júdep.
Tentek jel onyń taǵdyry shyǵar,
Arasha surap taldy aınaldy kep.
Sary japyraq – tal muńy bálkim,
Nege onda jerde qaldy bul altyn?
Kónbeske bar ma sharasy shirkin,
(Tańdap almaǵan taǵdyryn árkim.)
Sary japyraq, kári japyraq,
Qartaıdy kúz kep taǵy da atyrap.
Bir kezde balǵyn júrek-ed jasyl,
Jatqandaı búgin zaryǵa qulap.
Sary japyraq – órnegi zerli,
Aınaldy-aý tentek ermegi jeldiń.
Qys kelip erteń qar asty ony,
Shiriter ashshy kermegi jerdiń.
Sary japyraq – dir eter qyz muń,
Men-daǵy sondaı sýreti-em kúzdiń.
Alaı da dúleı shyr aınaldyrǵan,
Taǵdyrymyz da bir eken bizdiń.
SAIABAQTAFY BAQYLAÝ KAMERASYNAN REPORTAJ
Shýaq shashyp turǵandaı bádeni shyraı,
Myna qyzdyń, qudaı-aý, ádemisin-aı.
Qazir uqtym sulýlyq nemene ekenin,
Nege kerek ekenin álem úshin Aı.
Beli qypsha kóılegi, jeń ushyn búrgen,
Aq tánine quıǵandaı kelisim kirgen.
Osy ǵana tańdanyp, túsingendeımin,
Nege kerek ekenin jer úshin Gúlder.
Áldeneni esine ap bulyńǵyr dúzde,
Jymıady, kóńili toq sulýdyń kúzge.
Nurlandyryp jiberer, túıgenim jańa,
Nege kerek ekenin kúlýdiń Bizge.
Baqylaýmen osylaı, qatalap bir dem,
Ǵashyq etip jiberdi Ol matap ap birden.
Súıgim keldi, túsingim kelmedi biraq,
Nege kerek ekenin mahabbattyń Men.
Muqaǵalı Maqataev músini mańynda
Mys aldynda talaı ret synaldy altyn,
Min taǵýǵa asylǵa qumar ma árkim?
Muzartyna qonǵany óleń-shyńnyń,
Muzbalaqtyń aıyby shyǵar, bálkim?!
Myna dúnıe jalǵan ǵoı jalǵan dese,
Mánzúr bolmaı kóz shyǵy tamǵan keshe.
Mezgilinde oq atar,
máńgilikke, –
Múlgip ketseń jyr arnar jandar neshe.
Mahabbatshyl sezimniń deri kópti,
Mýzasyn aq ómirlik serik etti.
Marapatyn kóre almaı tirisinde,
Mańdaıynan sıpamaı ómir ótti.
Meımany ómir búginde jany azatta,
Marqaıyp júr me eken Ol ana jaqta?
Moıyǵanda kelmeske ketip edi,
Muń shaǵar jan bolmady da qazaqta.
Muńyn aıtyp, ıilmes qaıyńǵa asqaq,
Maqul kórip, aqynnyń jaıyn rastap,
Myń japyraq júrekti talǵa aınalyp,
Múmkin, janyn jiberdi aıyrbastap.
Meken be eken, jer degen oǵash talǵa,
Meken be eken kór degen? Ol aspanda!
Maıgúlimen qaraıdy kókten keıde,
Múshaırasynda óziniń Talasqanǵa.
Mys aldynda talaı ret synaldy altyn,
Min taǵýǵa asylǵa qumar ma árkim?
Muzartyna qonǵany óleń-shyńnyń,
Muqaǵalı aıyby shyǵar, bálkim?
Súımeýdi aqyry úırenip te aldym
Súımeýdi aqyry úırenip te aldym,
Aınaldym janǵa sezimsiz múlde.
Kúıinen shyqtym kúıreýik haldiń,
Qalǵanda jalǵyz ózińsiz birde.
Jibimesteıin júregim qatty,
Saǵyný endi jat uǵym maǵan.
Álemińde men muń edim tátti,
Qonaq ekenmin shaqyrylmaǵan.
Erteńdi oıǵa alyp, ókinbe buryn,
Baqytty búgin janbyz bilgenge.
Jalǵyzsyń. Tynysh ótýde ómiriń,
Aıyqqan dertten jalǵyzbyn men de.
Jetilmeı sezim túınegi balǵyn,
Solyp ta jatyr qalyń baý myna.
Súımeýdi sen de úırenip alǵyn,
Úırenip alǵyn saǵynbaýdy da!
***
Tómpeshteýmen tamshylar shatyrdy myń,
Jaýyn jaýyp kúzgi alǵash jatyr búgin.
Doly jel ǵoı, áıtpese bulttardy ala,
Batys jaqtan shubyrtyp shaqyrdy kim?
Ala bulttar shaqyryp, kúzgi daýyl,
Japyraǵyn taldardyń úzdi jaýyn.
Qyzyl-sary kıimin sheship tastap,
Jalań qaldy baqtary bizdiń aýyl.
Keshe ǵana kúz edi jaýǵan altyn,
Keshe ǵana kez edi aýla jarqyn.
Terezeden qarap-em aspan jylap,
Aı tyǵylǵan, áıteýir, jaýraǵan tún.
Qadalǵandaı sodan soń kóp tikenek,
Muzdaı aýa tamaqty ketti kenep.
Taý jaqqa eger qar tússe mezgilinsiz,
Ońtústikke qys erte jetti, demek!..
Alo...
Janym-aý, jany nurdan, táni gúlden,
Ózińsiz qalmady ómir máni múldem.
Saǵynyp, arpalysyp sary muńmen,
Qońyraý soǵyp turǵan taǵy bul men!
Uıalyń jatqan bolar jany shyǵa,
Kótermeı qoıasyń-aý taǵy, sirá?
Men-daǵy qasarysyp qoımadym ǵoı,
Sonshalyq jerik pe edim daýysyńa?!
Janymdy malyndyrǵan jasqa meniń,
Júregi uıalyńnyń tas pa dedim.
Sezemin kep turǵanyn sóıleskińniń,
Áıtpese, qaıtaryp ta tastar ediń.
Sóndirip tastar ediń nemese ony,
Soǵamyn.
Bul qońyraý deme sońy!
Sóıleskiń kelmese eger, tasta óshirip,
Bilmeısiń, nege sony?
Janym-aý, jany nurdan, táni gúlden,
Qońyraý soǵyp turǵan áli bul men!
Ótinem, o baılanys, sen de qosyp,
Jibershi, tildeseıin arýymmen!
Qarasha
Qarasha aıy, qara sýyq,
Qara jel tur alasuryp.
Qarasyrap tirlik kózi,-
Qaraýytqan qar asynyp.
Qarasózdi esip óleń,
Qarageýim esinegen.
Qara-qura qarbalasqan,
Qara keshte keshige me el...
Qara aǵashta salqyn, kári,
Qara qarǵa qarqyldary.
Qaraýyldap qoıshy malyn,
Qaraly muń-zar tyńdady.
Qarańǵyny kútken bóri,
Qaraqshydaı tikteldi óńi.
Qaraılaıdy qora jaqqa,
Qara jony búktelmeli.
Qara albasty sum reńdi,
Qara kóbeń ińir endi.
Qara qaǵaz hat alǵandaı,
Qarataý jaq kúńirendi.
Qarabaıyr oı almasqan,
Qarabarqyn boıaldy aspan.
Qarasyrap tirlik kózi,-
Qalatyndaı oıanbastan.
Qyz degen...
Qyz degen gúl - ósetin júreginde erdin,
Qyzǵaldaqtaı kirgizer reńin jerdiń!
Qyz degen jyr - súıdirip shaıyr etetin,
Shabyt syılap qaıǵyndy shaıyp ótetin!
Qyz degen kún - jylytar, kúlimdese eger,
Jylamasa eken, eshqashan túńilmese eken!
Qyz degen tún - juldyzdy, aıly aspan jaryq,
Perishte bop túsińe jaıǵasqan baryp!
Qyz degen baq - bir qonar, ushyryp alma,
Qysyp usta ýysyńdy, túsirip alma!
Qyz degen pák - tanyǵaı, súıinishim dep,
Qyz degen ol jaralǵan súıý úshin tek!..
***
Shydatpastaı quba qaıǵym,
Jalǵyz qaldym, jubat aıdyn,
Oralmady aqqýym sol,
Laılisindeı Jumataıdyń.
Aıdyn kól-aý, bul adamı,
Jalǵany ǵoı, sirá fánı,
Qusym qonsa shaqyrarsyń,
Mýzasymen Muqaǵalı.
O, aıdyn kól, senen endi,
Ketem men de, kóne bergin,
Saǵyna júr bizdi máńgi,
Saǵynyshymen Tólegenniń.
Tolqısyń ǵoı, qolqa salma,
Qala almaımyn men qasyńda,
Muńǵa shomsań kúı ótinip,
Dombyrańdy ber Qasymǵa.
Seni aıap jas tamyzar kún,
Sary ýaıymdy sary jańbyr.
Aıdynyńdy bult aımalap,
Oqyp berer Maǵjan jyr...
Qosh!!!
Ómir - Óleń
(Qalam + Qaǵaz + Sózder) = Óleń.
(Sulý + Sezim + Kózder)= Óleń.
(Shabyt + Mýza + Túnder)= Óleń.
Mahabbatpen gúlder egem.
Gúlder óner, kimge berem?
(Qalam + Qaǵaz + Sózder) = Óleń.
(Kóńil + Qaıaý + Kezder) = Óleń.
(Ósek + Renish + Jyldar) = Óleń.
Jabyrqaýmen muńdar egem.
Muńdar tóner, kim bar eler?
(Qalam + Qaǵaz + Sózder) = Óleń.
(Saýap + Kúna + Bezbeń) = Óleń.
(Ómir + Aqyn + Pende) = Óleń.
Bir kúnderi men de ólem.
Ólim keler, jerge de enem.
Jumaqta jan, kórde denem.
...Allah Uly qalasa eger.
...Amaldarym jarasa eger.
Fánı, Baqı arasy óleń.
Ómir - Óleń.
Súıshi kúzdi
Nege ekeni, qyzdary bizdiń óńir,
Jeldi salqyn súımeıdi, kúzdi qońyr.
Kóktemeni júredi jyrǵa qosyp,
Úzdige bir.
Sodan keıin júregi syzdar kúzdiń,
Meıirimge bólenbeı muzdar júz kún.
Jaýraǵyshtaý keledi, sondyqtan da,
Qyzdar bizdiń.
Telip jatar gúl-qyzdar kúzdi árnege,
Teńeýlerin estiseń, muzdar dene.
Kúzgi baqtan sonda da shyqpaısyńdar,
Qyzdar! Nege?
Tyńdashy arý, atyrap kúıshimizdi,
Qarashy arý, japyraq bıshimizdi.
Mendik myna júrekpen kúzge ǵashyq,
Súıshi kúzdi!..
Kúıshi kúzdi!
Bıshi kúzdi!
Sońǵy hat
Men ózińdi saǵynǵanym sonshalyq,
Qıalymmen sen turatyn mekenge,
Jatam ylǵı jol salyp.
Keıde qatty oıda uıyktap ketem de,
Saǵan tıis sezimimdi júremin,
Bildirýmen bótenge.
Sosyn bar ǵoı, ańsaıtynym sonshalyq,
Qoldaryńdy qolyma alyp túsimde,
Jatam súıip, tamsanyp.
Aıyrylyp senen qalmas úshin be,
Elesińdi kysam katty koınyma,
Sıqyrly álem ishinde.
Qıal-túsim, arman-músin, aq qusym,
Negizinde sen jaıynda tús kórý,
Jáne, oılaý - tatti icim;
Tús kórýmen tún uıqyny úsh bólý;
Shaldyqtyryp aıkezbelik dertine,
Saǵynyshtan ishken ý.
Túsimdesiń. Bolmasań da óńimde,
Osy jazyp otyrǵan hat neshinshi?
Toǵyzynshy keminde.
Osy jazyp otyrǵan hat - sheshýshi,
Jyrym bolsyn saǵan jazǵan eń sońǵy.
Keshirshi!
Jumbaq qyzdan hat kelgende
Hat joldapty bir jumbaq qyz jaqynda.
Kóshesine pálensheniń atynda,
Kezdesýge kelýimdi surapty,
Hatynda.
Naqty aıtpaǵan. Unatqany belgili.
Kún sársenbi. Kútip júrmin senbini.
Asyǵyspyn kókten juldyz jaýardaı,
Sol kúni.
Kezdeskisi kelgen myna bizbenen,
Qandaı sulý eken sonsha izdegen?
Kezdesýge barmaǵaly kóp bolǵan,
Qyzbenen.
Ýaqyt, shirkin, toqtap qalar mundaıda,
Ýaǵdalasqan kóriser kún júr qaıda?
Hatyn ashsam áripteriniń úni bar-
Bir maıda.
Onyń jazý úlgisinde dáleli,
Ǵajap desem - tabıǵaty, álemi.
Hatyn ashsam qıylyp tur ár sózi-
Ádemi.
Saýaly kóp, jaýap berý saýap-ty.
Kóbicine ózi bergen jaýapty.
Hatyn ashsam sóılemderi sóıledi-
Saýatty.
Qıalymmen kózdi osylaı munarlap,
Kórispegen janǵa turmyn jyr arnap.
Hatyn ashsam - kórkem sózdi ádebı-
Shyǵarma-aq.
Hat egesi keler eken jaqynda,
Kóshesine pálensheniń atynda.
Jazýshy qyz unatypty aqyndy,
Ol da unady aqynǵa.
Táttiden erip...
Táttiden erip keter bul tańdaı,
Til úıirerdeı shekersiń baldaı.
Sýrettegideı sulý ma janyń,
Ómirde deımin ekensiń qandaı.
Qulyn músheń ǵoı - kerim de, boıly,
Tıtimdeı min joq óńińde, meıli.
Sanada bir oı: tánindeı jany,
Sulý da shyǵar ómirde deıdi.
Sýretten kórip shyryn kúlicti,
Jaǵymdy, sezem, jylýdy tysqy.
Sendegi syrtqy sulýlyǵyńnan,
Assa ǵoı deımin sulýlyǵy ishki.
Suraqtar beker myna qoıylǵan,
Bilemin, bári shyǵady oıymnan.
Jandúnıeń de - jaqutty, senem,
Aqyqtan órgen tula boıyńnan.
Táńirim baq qyp basyma meniń,
Jasaǵan deımin asyra reńin.
Hor qyzdary kep shaqyrsyn, meıli,
Ózińe ǵana asyǵar edim.
Baqytyń bolar, ne deıin, ózge Er,
Ózińe baryp keleıin, sóz ber!
Teńiń bolmasam, keteıin bolmaı,
Sulýlyǵyńdy bir kóreıin kózben!
"...Aljasty ma, jańbyr jaýdy bir kúni..."
J.Sársek
NÓSERLI QAŃTAR
Qys emes pe? Endeshe, jaýmaı ma qar,
Anaý taýǵa óń berip, baýraıǵa bar.
Bárinen de baqtaǵy taldardy aıtshy,
Jamylmasa aq kórpe jaýraıdy olar!
Qazir qańtar, jaýyp tur jańbyr nege?
Kúbirlep tur baqta anaý tal birdeńe.
Kóz almaýda aljasqan aspan jaqtan,
Dirildeýmen jalańash salbyr dene.
Qara jeldi, nóserli, kún tumandy,
Qaqpas jeliń taldardy silkip aldy.
Qolshatyrsyz malmandaı bolǵan baqtyń,
Kók tuman da súıkenip shyrqyn aldy.
San butaqtar jalyna qudaıǵa endi,
Soqqan jelden ıilip qulaı berdi.
Japyraǵyn úzse de kúz kelgende,
Jek kórmegen shyǵar-aý bulaı jeldi.
Qańtar bıyl osylaı jaýdaı tóndi,
Muzdaı tamshy toqtamaı saýlaı berdi.
Kók aspan-aý, kórpesin bershi baýdyń,
Qys emes pe, aq qaryń jaýmaı ma endi?!
***
Ósek-aıańnan aman júr edim,
Sózderden ergen jaman júdedim.
Bir-aq qańqý sóz jetedi eken ǵoı,
Aýyrtý úshin adam júregin.
Taptalyp sosyn kókke ulyp ketem,
Aqtalyp elge kek qýyp netem?
Óshigý úshin zamandasyńa,
Ǵaıbat sóılegeni jetkilikti eken,
Jarylyp keıde ketesiń jazdap,
Shesheden sybap, ákesin qozǵap...
Zańǵa da bir kún demalys bolsa,
Alatuǵyn bir, kek, óshimdi azdap.
Ósekshi janǵa kim ersin ezdik,
Syrtymnan ishteı kúlersiń, sezdik.
Maǵan bireýdi ósekteı kórme,
Meni de bir kún júrersiń sóz qyp.
Ǵaıbat kólinde, eı, inim júzgen,
Sen de aýlaq "qatyn", peıiliń bizden!
Meıirimsiz bop ketip baramyn,
Soǵysam dep san meıirimsizben.
Sabyr!
Kóńilsizdik - 1
Taǵy da kóńilsizdik,
Taǵy da sol únsizdik.
Ótýde qyzyq emes -
Ómirim ózińsiz túk.
Taǵy da araısyz kún,
Taǵy da aq Aısyz tún.
Men jaıly suramańyz,
Halińiz qalaı sizdiń?
Siz daǵy muńlysyz ba,
Baǵyńyz turǵysyz ba?
Júrsiz be otyrǵyzyp,
Aq úmit - gúldi muzǵa?
Men daǵy úmitsizbin,
Úmitsiz qyzyqsyz tym.
Áıteýir sońyńyzdan,
Baramyn júzip sizdiń.
Taǵy da kóńilsizdik,
Taǵy da sol únsizdik.
Eńsem júr kóterilmeı,
Sezimsiz, ózińsiz tik.
Kóńilsizdik...
Mazam joq ózińsiz túk.
ÓLIARA
Qys kelerde, qoshtasarda kúzbenen,
Japyraqtar qulap bitken shaǵynda,
Qoshtaskanym jáne meniń sizbenen,
Kóz aldymda, jadymda.
Kúz qaıtarda, qys kelerde yzǵarly,
Jiberdim men kúzben birge sizdi de.
Basa almadyq jańa jaýar biz qardy,
Sala almadyq sol qarǵa appaq izdi de.
Al, qys bolsa, shasha berdi aq mamyǵyn,
Jany bólek!
Mendik muńdy ol sezbedi.
Kúz de ketti syılap maǵan sary muń,
Sizben birge kózdep, bálkim, ózgeni?
Áli qaıta kórermin kúz degendi,
Al, sizdi endi eki talaı kórýim.
Kúzden nalyp, sizden qalyp, men endi,
Saǵynyshtyń jutar boldym sary ýyn.
Saǵynyshpen óter boldy-aý jyl mazdaı.
Sary ýaıymdy ǵashyktan kim jemeıdi?
Saǵynyshsyz keter me edim jyr jazbaı,
Saǵynýda kerek eken,
E, meıli!
Dáýren AIMANBETOV
