«Qazaqstan» respýblıkalyq teleradıokormarasıasy «Qazaqstan-Semeı» telearnasynyń jabylýyna baılanysty málimdeme taratty, - dep habarlaıdy «Qamshy» portaly.
«Qazirgi ýaqytta «Qazaqstan» RTRK» AQ (budan ári – Korporasıa) Korporasıanyń tıimdiligin arttyrý maqsatynda ony transformasıalaýdy júzege asyrýda.
Memleket aýmaǵynyń 98% habar taratýmen qamtıtyn jáne ár óńir ortalyǵynda ornalasqan 13 oblystyq jáne Semeı qalasyndaǵy 1 qalalyq fılıaly bar, memlekettik aqparattyq saıasatty júzege asyratyn «Qazaqstan» telearnasy Korporasıanyń basty medıa-resýrstarynyń biri bolyp tabylady.
1997 jyly óńirlerdi ákimshilik reformalaý kezinde Semeı jáne Shyǵys Qazaqstan oblystary biriktirilip, Shyǵys Qazaqstan oblysy Óskemen qalasyndaǵy bir ortalyqqa baǵyndyryldy. Nátıjesinde, bir ákimshilik-aýmaqtyq birlikte birin-biri qaıtalaıtyn 2 telearna qyzmet atqara bastady. Bul jaǵdaı memlekettik qarajattyń tıimsiz jumsalýyna alyp keldi.
Budan basqa, «Aqparattyq Qazaqstan – 2020» Strategıalyq damý josparyna sáıkes 2018 jylǵa qaraı Qazaqstan Respýblıkasynyń barlyq aýmaǵy sandyq habar taratýǵa tolyǵymen aýystyrylý qarastyrylǵan. Iaǵnı, 2018 jyly qyzmet kórsetýi úlken shyǵyndardy qajet etetin analogtyq habar taratý tolyǵymen toqtatylady. Sandyq paketke, qalalyq deńgeıdegi arnalardy qospaǵanda, barlyq oblystyq telearnalar engiziletin bolady.
Joǵaryda aıtylǵandy negizge ala otyryp, memlekettik qarajatty tıimdi jumsaý maqsatynda Korporasıa «Qazaqstan-Semeı» telearnasyn «Qazaqstan-Óskemen» telearnasynyń quramyna qosý týraly sheshim qabyldady. Sonymen birge, Semeı qalasynyń turǵyndar sany 339 myńnan astam adamǵa jetetinin jáne olardyń basym bóligi «Qazaqstan-Semeı» telearnasynyń aýdıtorıasyn quraıtynyn eskere otyryp, telearnanyń materıaldyq-tehnıkalyq bazasyndaǵy tanymal baǵdarlamalardy «Qazaqstan-Óskemen» telearnasynyń habar taratý kestesine qosý arqyly saqtap qala otyryp, Semeıde keńeıtilgen tilshiler qosynyn qurý týraly sheshim qabyldandy.
Osy oraıda, «Qazaqstan-2050» damý Strategıasyn, Elbasy Nursultan Nazarbaevtyń Ult jospary - «100 naqty qadam» bes ınstıtýsıonaldyq reformasyn, «Máńgilik el» patrıottyq aktisin, «Nurly jol» baǵdarlamasyn jáne basqa da baǵdarlamalyq qujattardy oryndaý sheńberinde memlekettik aqparattyq saıasattyń basym baǵyttary búkil Shyǵys Qazaqstan oblysyn habar taratýmen tolyq qamtıtyn «Qazaqstan-Óskemen» telearnasy arqyly júzege asyrylatyn bolady.
Qazirgi ýaqytta Semeı qalalyq telearnasynyń jańa jaǵdaıdaǵy óndiris kólemin anyqtaý maqsatynda Korporasıa qyzmetkerlerinen turatyn arnaıy jumys toby quryldy. Onyń qorytyndysy boıynsha shtattyq quramy shamamen 30 birlikten turatyn jańa shtattyq keste qalyptastyrylmaq. Semeı q. fılıalynda qyzmetinen bosatylǵan barlyq qyzmetkerlerge Korporasıanyń óndiristik qurylymdarynda, atap aıtqanda Astana, Almaty qalalaryndaǵy jáne basqa da oblystyq fılıaldardaǵy bos qyzmet vakansıalary basymdyq negizde usynylatyn bolady.
Munymen qatar, «Qazaqstan-Semeı» telearnasynyń qarjylyq qyzmetiniń shyǵyny basym ekendigin, atap aıtqanda 158,5 mln. teńgeni quraıtyn jyldyq jalpy shyǵynnyń qurylymy tómendegideı ekenin atap ótken jón:
- jarnama qyzmeti esebinen túsetin komersıalyq kiris «Qazaqstan-Semeı» fılıalynyń jalpy kiris somasynyń 11% quraıdy;
- jergilikti búdjetten kiris somasy 19% quraıdy;
- qalǵan shyǵyn memlekettik búdjet esebinen dotasıalanady» delingen málimdemede.
