Qazaqstanda jol qozǵalysy erejecin buzǵandarǵa salynatyn aıyppuldyń kólemin azaıtý usynyldy, - dep habarlaıdy «Qamshy» portaly  Tengrinews.kz – ke silteme jasap.

Mundaı pikir búgin Astanada Bas prokýratýra ujymynyń otyrysy kezinde aıtyldy.

"Aıyppuldy ósirý jol qozǵalysy erejesin buzýshylyqtyń azaıýyna ákelmeıdi. Ákimshilik jazany qaıta qaraýǵa úsh sebep bar. Birinshiden, eldiń kirisi azaıdy - bul ekonomıkalyq jaǵdaıǵa baılanysty. Ekinshiden, 2001 jyldan beri keıbir aıyppuldardyń kólemi 25 esege - 15 myńnan 396 myńǵa deıin ósti, sonymen qatar, aı saıynǵy ortasha jalaqy jeti ese ósti - 17 myńnan 124 myńǵa deıin", - dedi Bas prokýratýra ókili Áset Shyndalıev.

Ol Bas prokýratýra basqa elderdiń tájirıbesin zerttegenin aıtty. Batys elderi men Reseıde jol qozǵalysy erejesin buzǵandarǵa salynatyn aıyppul kólemi az bolyp shyqty. Shyndalıev naqty derekter keltirdi.

"Jyldamdyqty asyrǵanǵa salynatyn aıyppuldyń eń joǵarysy Lúksembýrgte 45 myń teńge, Reseıde 22 myń bolsa, Qazaqstanda 80 myń teńge. Bul esepshiniń jalaqysyna nemese kúzetshiler men júrgizýshilerdiń eki aılyq jalaqysyna teń", - dedi Áset Shyndalıev.

Sonymen qatar, Áset Shyndalıev jol erejesin buzǵandardyń aıyppuldy dereý tólemeıtinin aıtty. "Eń joǵary aıyppul - 396 myń teńgeni 100 adamnyń 17-si ǵana tóleıdi. Bul óte óreskel ereje buzýshylarǵa - mas júrgizýshiler men júrgizýshi kýáligi joqtarǵa salynatyn aıyppul. Olardy qamaýǵa alýǵa da bolmaıdy. Aıyppul kólemi úlken bolǵan saıyn ony tóleý yqtımaldyǵy azaıady", - dedi Shyndalıev.

Keńeıtilgen otyrysta Bas prokýratýranyń birinshi departamentiniń basshysy Qanat Seıdǵapbarov jol qozǵalysy erejesin buzandarǵa salynatyn aıppul kólemin qaıta qaraý týraly usynys qaralatynyn aıtty.

"Sheshim jobasyn daıyndadyq. Ol tanystyrylady. Rastalǵan jaǵdaıda ýákiletti organdarǵa jiberiledi. Keıin biz bul usynysqa zań sheńberinde bastamashylyq etemiz. Bul jaqyn ýaqytta bolady", - dedi ol.