Búgin Almatyda Qazaq Ulttyq Agrarlyq Ýnıversıtetiniń irgesi qalanǵanyna 85 jyl tolýyna oraı oqý ordasynda ǵylymı konferensıa ótti. Bul týraly «Qamshy» portaly QazAqparatqa silteme jasap habarlaıdy.

Jıynǵa QR Aýyl sharýashylyǵy mınıstri Asyljan Mamytbekov pen qala ákimi Baýyrjan Baıbek qatysty. 

Mınıstr oqý ornynyń mereıtoıyna baılanysty Memleket basshysy Nursultan Nazarbaevtyń quttyqtaý sózin jetkizdi. "Qazaq ulttyq agrarlyq ýnıversıtetiniń ujymyn  85 jyldyǵymen quttyqtaımyn. Ýnıversıtet - elimizdegi aýyl sharýashylyǵy óndirisine arnap bilikti mamandar daıyndaıtyn irgeli  oqý orny. Ony myńdaǵan túlekter bitirip, otanymyzdyń AÓK salasynyń damýyna úles qosty. Ýnıversıtet óz jumysyn zaman talabyna saı uıymdastyryp keledi. Stýdentterge sapaly bilim berip, ǵylymı-zertteý nátıjesin arttyrýda. Inovasıalyq izdenisterdi damytýda. Álemde halyq sany ósip, sapaly azyq-túlikke degen suranys barǵan saıyn artyp otyrǵan kezde aýyl sharýashylyǵy óndirisi  salasy árdaıym ózekti bolyp qalady. Bul baǵytta Ýnıversıtet ujymyna júkteletin jaýap arta túseri anyq", - dedi mınıstr. 

Qala ákimi Baýyrjan Baıbek Almaty qalasynyń damýyndaǵy agrarlyq salanyń alar orny týraly aıtyp ótti. "Memleket basshysy ǵylymnyń damýyna úlken mán berip otyr. Jaqynda Almatyǵa saparynda ol qalanyń aýqymdy megapolıs retindegi mańyzyn tilge tıek etti. Qala turǵyndaryn azyq-túlikpen qamtamasyz etý asa ózekti másele. Almatynyń damýy oblyspen tikeleı baılanysty. Ýnıversıtettiń ımporttyq ónimderdiń ornyn basý maqsatynda salalyq klasterdi qalyptastyrýda qosyp otyrǵan úlesin aıta ketý mańyzdy", -dedi qala ákimi.