Shymkent ákiminiń shtattan tys keńesshisi qazaqsha sóıleýdi suraǵan blogerlerge zekip tastady

Shymkent qalasy ákiminiń shtattan tys keńesshisi Danat Jýmın qazaqsha bilmegeni úshin daýǵa qaldy dep habarlaıdy «Qamshy» portaly rgmedia.kz-ke silteme jasap.

Jańa qyzmetke taǵaıyndalǵanyna kóp ýaqyt bola qoımaǵan 32 jastaǵy D. Jýmın shymkenttik jýrnalıser jáne blogerlerdi jaqynyraq tanysý maqsatynda kezdesýge shaqyrǵan. Óz sózin orys tilinen bastaǵan ákimniń shtattan tys keńesshisiniń bul áreketi qazaq tildi blogerler men jýrnalıserdiń qytyǵyna tıgen. Qonaqtar sheneýnikten memlekettik tilde sóıleýdi ótingende, Danat Esboluly óziniń shetelde bilim alǵanyn jáne ózine yńǵaıly tilde ǵana sóıleıtinin aıtyp jýrnalıserge dúrse qoıǵan.

«Danat Jýmın óz sózin sálemdesýden bastady. Orys tilinde. Bizdiń qazaq tilinde sóıleý týraly ótinishimizge qulaq aspady. Qaıta kerisinshe, «men shetelde oqydym, maǵan ózim biletin tilde jaýap bergen unaıdy» dep ashýlanyp ketti», – deıdi bloger Aıgúl Orynbek.

Kezdesýge kelgenderdiń birqatary osy sátte oryndarynan turyp shyǵyp ketken. Blogerler qala ákiminiń baspasóz qyzmetindegilerge habarlasyp, mán-jaıdy túsindirip berýin talap etken. Bir qyzyǵy, ákimniń baspasóz qyzmetindegiler bul kezdesýden beıhabar bolyp shyqty. Kezdesý ornyna qalalyq ákimdiktiń apparat basshysy Rashıd Aıýpov pen ákimniń baspasóz hatshysy ári keńesshisi Nurlybek Jeńisbek kelip, shyǵyp ketken qonaqtardy ishke qaıta alyp kirgen. Qazaq tildi memlekettik qyzmetkerler kelgen soń kezdesý ármen qaraı jalǵasqan.

«Óz tilin bilmegen soń keregi ne?.. Qaıta ákimdiktiń apparat basshysy Rashıd Aıýpovtyń kóregendiligine rıza boldym. Ol da shetelde bilim alǵan ǵoı», – deıdi bloger.

Qonaqtar uıymdastyrýshylarǵa suraqtar qoıyp, jaýaptar aldy. Kezdesý sońynda Danat Jýmın Shymkentte júrip qazaqsha úırenetinin ýáde etti.

Aıta keteıik, Danat Esboluly “Bolashaq” baǵdarlamasy boıynsha AQSH-tyń Montana shtatynda bilim alǵan.