Oral qalalyq meshitiniń naıb-ımamy Naýryz Ubaev pen onyń zaıyby Álıanyń otbasynda úshem ómir esigin ashty, - dep habarlaıdy «Qamshy» portaly QazAqparatqa silteme jasap.

Oblystyq densaýlyq saqtaý basqarmasynyń baspasóz hatshysy Flúra Samatovanyń aıtýynsha, oblystyq perınataldyq ortalyqta 27 qarashaǵa qaraǵan túni araǵa bir-eki mınýt salyp, úsh qyz bala dúnıege kelgen. Olardyń úlkeniniń salmaǵy - 2 kg 330 gram, boıy - 44 sm, ortanshysyniki - 2 kg 290 gram, boıy - 43 sm, kishisiniki - 2 kg 600 gram, boıy - 46 sm.

Qazirgi kezde perınataldyq ortalyqta jatqan anasy men sábılerdiń jaǵdaıy qalypty. Sóıtip otbasyndaǵy balanyń úlkeni Álıjannyń sońynan birden úsh birdeı qaryndasy ilesti.

Aıta keteıik, dál sol kúni úshemmen bir ýaqytta 22 náreste ómir esigin ashsa, sonyń 15-i - qyz, jeteýi - ul bala kórinedi.