Ulttyq bank quny 20 myń teńgelik banknottardy aınalymǵa engizedi, - dep habarlaıdy «Qamshy» portaly Tengrinews.kz – ke silteme jasap.

Jańa banknottar aınalymǵa erteń, ıaǵnı 1 jeltoqsan kúni shyǵarylady.

Banknottyń Qazaqstan Respýblıkasynyń Tuńǵysh Prezıdenti memlekettik merekesine oraı shyǵarylatyny habarlandy. Bul banknot 2013 jyly daıyndalǵan. Basqa aqsha belgilerimen qatar aınalymǵa shyqqan kezeńnen bastap ol zańdy tólem quraly bolyp esepteledi jáne tólemder men aqsha aýdarymdarynyń barlyq túrinde qabyldanady.

Banknottardyń dızaıny aınalymdaǵy aqsha belgilerimen biryńǵaı stılde oryndalǵan: bet jaǵynyń basym beıneleri tiginen, al syrt jaǵynda kóldeneń ornalasqan. 20 myń teńgelik banknottyń ólshemi: 155h79 mm. Banknot kók-sur tústi.

Bet jaǵynda negizgi beıneler "Qazaq Eli" monýmenti, pyraq jáne Máńgilik el saltanatty arkasy beınelengen. "Qazaqstannyń táýelsizdigin beıneleıtin "Qazaq Eli" tarıhı-memorıaldyq kesheni Astana qalasynyń on jyldyq mereıtoıy qarsańynda ashyldy. Stela bıiktigi - 91 metr - ol Qazaqstan táýelsizdik alǵan 1991 jyldy bildiredi. Eskertkishtiń mármár negizi Qazaqstan halqynyń taza oı-nıeti men etnıkaaralyq úılesimin kórsetedi. Al tóbesinde Samuryq qus bar stelanyń ózi Qazaqstan halqynyń bolashaqqa, odan ári damý men gúldenýge degen umtylysyn kórsetedi", - dep jazylǵan Ulttyq banktiń baspasóz habarlamasynda.

"Banknottyń joǵarǵy sol jaǵynda pyraq beınelengen, ol túrkitildes jáne kóshpendi halyqtardy qosa alǵanda kóptegen mádenıette taza nur men ómirdiń, shabyt pen jemisti eńbektiń, maqsatqa umtylýshylyq pen bıliktiń nyshany retinde qabyldanady. Banknottyń tómengi jaǵynda ortada Máńgilik el saltanatty arkasy - erkin eldiń máńgilik ıdeıasy, jalpyǵa ortaq Qazaqstan úıiniń ulttyq ıdeıasy sáýlet qurylysy turǵysynan beınelengen. Syrt jaǵynda banknottyń ortasyndaǵy negizgi beıne Qazaqstan kartasynyń pishini jáne astanamyz - Astana qalasynyń Qazaqstan Respýblıkasynyń Konstıtýsıasynda negizi qalanǵan bılik tarmaqtaryn bólý qaǵıdatyn kórsetetin tártippen ornalasqan Aqorda, Parlament jáne Úkimet ǵımarattary bar kórinisi beınelengen", - dep habarlanǵan Ulttyq bank baspasóz qyzmeti taratqan habarlamada.

Taratylǵan habarlamaǵa sáıkes, jańa banknot Qazaqstan teńgesiniń eń qorǵalǵan aqsha belgisi, sonymen qatar álemdegi eń qorǵalǵan banknottardyń biri bolyp esepteledi. "Qorǵaý úshin qoldan jasaýdan qorǵaý ındýstrıasyndaǵy sońǵy ınovasıalar, jalǵan aqsha jasaýshylarǵa qarsy is-qımyldyń jańartylǵan ári kúsheıtilgen klasıkalyq tásilderi paıdalanyldy. Bet jaǵyndaǵy negizgi qorǵanysh elementter: banknottyń eki jaǵynan jaryqqa tosyp qaraǵanda kórinetin samuryq mıftik qusy túrindegi kompozıttik jetildirilgen sýtamǵy belgisi jáne móldir oryn túrindegi qus pishini. Dızaınynyń túpnusqalylyǵyn tekserýdi jeńildetetin tús aýystyrý elementteri pyraq, móldir orynda kórinetin qazaqtyń oıý-órnegi jáne tús aýystyratyn qorǵanysh úzik-úzik jip túrinde ornalasqan", - dep jazylǵan Ulttyq bank habarlamasynda.

Banknottyń syrt jaǵynda birqatar qorǵanysh elementi bar: sýtamǵy belgisi, tús aýystyrý boıaýmen basylǵan oıý-órnek elementi bar móldir oryn, jaryqqa tosyp qaraǵan kezde bet jaǵyndaǵy bóliktermen birtutas sýretti quraıtyn qosarlanǵan beıneniń bólikteri. Banknottyń tómengi sol jaq buryshyndaǵy nomınaly da kólbeý buryshyn ózgertken kezde túsin aýystyrady.