Almatyda soqqy alyp aýrýhanaǵa túsken jedel-járdem qyzmetkerleriniń isine qatysty jańa jaǵdaıattar paıda boldy. Aıyptalýshynyń advokaty oqıǵa ornynda kúdiktige dárigerler birinshi bolyp qol jumsaǵan dep otyr. Bul týraly «Qamshy» portaly Tengrinews.kz – ke silteme jasap habarlaıdy.

Jedel járdem dárigerin uryp-soqty dep aıyptalyp otyrǵan er adamnyń advokaty bolǵan oqıǵanyń múldem basqa nusqasyn aıtyp otyr. Advokat Raıfa Baımuhametovanyń aıtýynsha, oqıǵa ornynda dáriger birinshi bolyp ashýlanyp, soqqy jasaǵan, sosyn ǵana qazir kúdikti retinde qamaýda jatqan er adam jerden tas alyp, jedel járdem qyzmetkerine laqtyrǵan.

Qorǵaýshynyń aıtýynsha, bul málimet jedel járdem kómegine júginýshi qyz ben onyń qurbysy bergen túsiniktemelermen sáıkes keledi. "Qyz jedel járdemdi shaqyrdy. Ol júreginiń aýyryp turǵanyn aıtqan. Bastapqyda birinshi brıgada, keıin ekinshisi kelgen. Dárigerler qyzdy aýrýhanaǵa áketpek bolǵan, biraq qyz ben meniń qorǵaýymdaǵy adam buǵan qarsy bolady. Dárigerler bolsa óz aıtqandarynan qaıtpaıdy. Sol kezde aıyptalýshy qyzben birge jedel járdem kóligimen baratynyn aııqan. Biraq dárigerler oǵan qarsy boldy", - deıdi advokat.

Osydan keıin Baımuhametovanyń aıtýynsha, er adam men dárigerlerdiń arasynda kelispeýshilik boldy, dárigerlerdiń biri tosynnan aıyptalýshynyń betine soqqy jasaıdy. "Onyń murny syndy. Budan keıin ol tasty alyp, ózin qorǵaý úshin laqtyra saldy. Ol tasty bireýge dáldep laqtyrmaǵanyn aıtty, onyń múmkindigi de bolmady - beti qan-qan boldy, kózi jasaýrap turdy", - dedi qorǵaýshy. 

Dál osy nusqany aıyptalýshynyń dosy Batyr Iagofarov ta aıtyp otyr.

«Ol meniń jaqsy dosym, tanystyǵymyzǵa 16 jyl boldy. Ol eshqashan ashýyn kórsetpegen. Onyń eki joǵary bilimi bar: qurylys jáne ekonomıka salalarynda. Onyń kámeletke tolmaǵan eki balasy bar, turaqty jumysy bar, asyraýynda egde jastaǵy ata-anasy bar. (...) Barlyǵyńyzdan málimetke túrli jaqtan qaraýlaryńyzdy suraımyn jáne erte bastan sheshim shyǵarmaýlaryńyzdy suraımyn, rastalmaǵan derektermen adamdy aıyptamaýlaryńyzdy suraımyn», - dep málimdedi ol. 

Qazirgi ýaqytta Almatyda jedel járdem qyzmetkerlerine shabýyl jasady delingen kúdikti ýaqytsha ustaý ızolátorynda qamaýda otyr Onyń kepil arqyly bosatý týraly ótinishi sot tarapynan qanaǵattandyrylmady. Qazir sotqa deıingi tergeý amaldary júrýde. Sonymen qatar, kúdiktiniń dosynyń aıtýynsha, aıyptalýshy tarap jábirlenýshi tarappen baılanysyp, kómektesýge usynys jasaǵan.

Eske salaıyq, oqıǵa 26 qarashaǵa qaraǵan túni Naýryzbaı aýdanynyń jeke sektorynda boldy. Qyzmet kórsetýde er adam jedel járdem qyzmetkerlerine shabýyldap, olardyń biriniń basyna kirpishpen soqqy jasaǵan. Zardap shekkenderdiń biri aýyr jaǵdaıda aýrýhanaǵa tústi. Ol es-tússiz kúıde jansaqtaý bóliminde jatyr. Shabýyldaǵan er adam ustaldy.  

Aıta keteıik, oqıǵadan keıin Almatyda jedel járdem dárigerleriniń tótenshe jıyny ótti. Dárigerler bolǵan oqıǵaǵa baılanysty narazylyq tanytyp, shaqyrýlarǵa shyǵýǵa qorqatynyn málimdedi.