Almaty ákimdigi kóktemdegi qar sýynyń kedergisiz ótýi úshin Esentaı ózenin tazalaý jumystaryn jalǵastyrýda, - dep habarlaıdy «Qamshy» portaly QazAqparatqa silteme jasap.

Qalalyq komýnaldy qyzmet ókilderi Bostandyq aýdanyn kóriktendirý jumystarynyń aıasynda Esentaı ózeninen 5 tonna laı massasyn shyǵardy.

Negizgi jumystar ózenniń ál-Farabı kóshesinen Tımırázev kóshesine deıingi 1 shaqyrymdaı aýmaǵynda júrdi. Mamandardyń aıtýynsha, ózendegi 7 kaskadtyń 70-90%-y qum-baldyrmen kómilip qalǵan.

«Qazseldenqorǵaý» kásipornynyń jumysshylary 1 ekskavator men 1 júk kóligi, «Almaty tazalyq» kásiporny 6 júk kóligi, Qutqarý qyzmeti 1 avtokran qoqys shyǵardy.

Ózenniń basqa bólikterin tazalaý mamyr aıyna belgilendi.

Sanıtarlyq tazalaý jumystaryna Bostandyq aýdany komýnaldyq qyzmetiniń 7 birlik tehnıkasy men 60 qyzmetkeri jumyldyryldy.

«Almatyekologostroı» MKK Esentaı ózeninde tehnıkalyq qurylǵylardyń ahýalyn tekserip jatyr.

Qazirgi tańda «109» qyzmeti aýdandyq ákimdiktermen birige otyryp, Úlken jáne Kishi Almaty, Esentaı, Abylǵazy, Aqsaı, Qarǵaly, Tiksaı ózen-kólderiniń baseınderinde tótenshe jaǵdaıdyń aldyn alý josparyn quraýda.