Qańtar aıynyń 18-shi juldyzynda Almaty qalasynda «Qýyrdaqtyń kókesi» atty alǵash qazaqtyń etno-mádenı restorany ashylmaq, - dep habarlaıdy «Qamshy» portaly.

Atalmysh kafede usynylatyn taǵamdar qaladaǵy birde-bir meıramhana nemese dámhanada kezdespeıtindikten, bul úlken jańalyq bolǵaly tur.

Esterińizde bolsa, ótken jyldyń qarasha aıynda Almaty qalasynyń ákimi Baýyrjan Baıbek qazaqtyń ulttyq taǵamdaryn qaıta jandandyrýdyń mańyzdylyǵyn, sol úshin ulttyq taǵamdardyń kafe-restorandaryn ashý kerektigin erekshe atap ótken bolatyn. Ákimniń ol usynysy aıtylǵan jerde qalyp, qala kásipkerlerinen eshkim ilip ákete qoımaǵan edi. Sol olqylyqtyń ornyn Almaty tehnologıalyq ýnıversıtetiniń stýdenti Erkebulan Mákenov toltyryp otyr.

 Aldaǵy dúısenbi kúni qala turǵyndaryna esigin aıqara ashatyn meıramhana umyt bolǵan qazaqtyń taba nan, bujyǵy, qaryndaǵy maı, túıeniń qýyrdaǵy, búrme qaryn, ýyz, jarma qurt, qaǵnaq,túımesh, syrbaz, balqaımaq, jórgem, jaý jumyq jáne ózge de kóne taǵamdary usynylady. «Qýyrdaqtyń kókesinde» taǵamdardyń barlyǵyn kóneniń kózin kórgen, ultymyzdyń dástúr-salty men taǵamdarynan aqpary mol, tájirıbeli aspazshylar qazaqtyń baıyrǵy tehnologıalarymen jasaıtyndyqtan, dámin kórgen de kórmegen de armanda.

«Ájelerimizdiń aıaly alaqanymen jasalyp, urpaqtan-urpaqqa berilgen qazaqtyń tól taǵamdaryn nasıhattaý – basty maqsatymyz» deıdi meıramhana ashqan Erkebulan Mákenov.