Qazaqstan sheneýnikteri syılyqqa alǵan zattaryn aýksıonǵa salmaqshy. Bul týraly qarjy mınıstri Baqyt Sultanov málimdedi.

Budan bylaı memlekettik qyzmetshiler túrli sebeptermen ózderine syıǵa tartylǵan zattardy memleketke ótkizetin bolady. Qarjy mınıstrligi quramyndaǵy memlekettik múlik jáne jekeshelendirý komıteti ol zattardy satylymǵa shyǵaryp, qazyna qorjynyn toltyrmaq kórinedi.

Úkimet otyrysynda qarjy mınıstri áriptesi Asyljan Mamytbekovtyń qytaılyq áriptesterinen alǵan syılyǵy týraly da aıtyp qaldy.

«Biltyr jyl sońynda bir qytaılyq telefon ótkizildi. Telefon dy qytaılyqtar aýyl sharýashylyǵy mınıstrligi ókilderimen resmı kezdesýde syılaǵan. Ony tipti, Asyljan Sarybaıulynyń ózi (memleketke – red.) ótkizýi múmkin», - dedi B. Sultanov. Bas qarjygerdiń aıtýynsha, ol telefon endi gosreestr.kz  saıty arqyly satylymǵa shyqpaq.

Jańadan qabyldanǵan «Memlekettik qyzmet týraly» zańda memlekettik qyzmetshilerdiń qandaı da bir syılyq alýyna tyıym salynǵanyna qaramastan, qarjy mınıstri ondaı jaǵdaılardyń bolyp turatynyn moıyndady. Onyń aıtýynsha, sheneýnikterge halyqaralyq uıymdardan syılyqtar kelip turady. Resmı kezdesýler kezinde de taraptar bir-birine syı-káde jasaıdy. Sol zattar endigi ýaqytta belgilengen tártippen memleket menshigine tapsyrylatyn bolady.