Aqtaý qalasynda úshem dúnıege keldi. Nárestelerdiń úsheýi de – qyz, - dep habarlaıdy «Qamshy» portaly 24-arnaǵa silteme jasap.

Nárestelerdiń úsheýi de – qyz. Ata-anasy olarǵa Raıana, Daıana jáne Aıana degen esim qoıypty. Sábılerdiń árqaısysynyń ortasha salmaǵy 2 keliden asady. Buǵan deıin eki uldy ómirge ákelgen 33 jastaǵy Aqbıbi Ótepova – endi kópbalaly ana. 3 qańtarda dúnıe esigin ashqan sábıler men anasy 12 kún boıy dárigerlerdiń baqylaýynda bolyp, úıine jiberildi. Mamandar merziminen erte bosanǵan ana men balalardyń jaǵdaıy birqalypty dep otyr. Jyl basynan beri óńirde 771 sábı ómirge kelipti. Aımaqtaǵy altyn qursaqty analar byltyr 20 myńǵa jýyq balany jaryq dúnıege ákelip, Mańǵystaý halqynyń sany 3,5 paıyzǵa kóbeıgen. Olardyń 113-i egiz bolsa, úsheýi – úshem.

Aqbıbi Ótepova, úshemniń anasy:

- 11 aptasynda úshem bolatynyn bildim. Onda da sene qoımadym. Ekinshi tekserýge barǵanda kim bolatynyn naqty aıtty. Rızamyn. 2 er balam bar. Endi úshem bolǵan soń, kópbalaly analardyń qataryna qosylyp jatyrmyn. Qyz-kelinshekterge de osyndaı baqyt tileımin! Roza Badanova, oblystyq perınataldyq ortalyǵy dırektorynyń orynbasary: - Balalardy aman saqtap qalý maqsatynda bosaný operasıa jasaý jolymen aıaqtaldy. Balalardyń salmaqtary 7 aılyq salmaǵyna saı keledi. Balalar salmaq qosty, denderi saý. Kerekti tekserýden ótti. Anasynyń jaǵdaıy jaqsy, súti jetkilikti. Ózimizdiń esebimiz boıynsha, balalar ári qaraı jaqsy damyp ketedi dep oılaımyz.