Aqtaýda júkti áıelderge arnalǵan kıimder tigile bastady. Ári yńǵaıly, ári sándi. Júkti áıelder endi ózine qajetti kıimge tapsyrys bere alady, - dep habarlaıdy 24.kz.
Ásirese, Aqtaýdaǵy «Dárıa» sehynyń ónimderine degen suranys kúnnenkúnge artyp keledi. İsmer Ásel Jekenova birneshe qaladan dúkender jelisin ashyp, 365 kún ishinde bolashaq analarǵa arnap, 2 myńǵa jýyq kıim tigip berdi. Láıla Tóleshovanyń otandyq ónimderge búıregi buryp turady. Jas ana jaqynda besinshi balasyn dúnıege ákeledi. Júktilik kezinde de sándi ári yńǵaıly kıingendi jaqsy kóretin kelinshek bul dúkenniń turaqty tutynýshysy. Láıla Tóleshova, satyp alýshy: - Júktilik kezinde sándiligimen qatar yńǵaıly kıimderdi tabý óte qıyn. Sheteldik taýarlardyń baǵasy óte qymbat. Al ózimizde shyǵyp jatqan myna kóılekter óte sapaly, ári baǵasy da arzan. Tipti júktilik kezinde de, bala emizgende de kıe berýge bolady. 1 aıdan 9 aıǵa deıin kıýge bolady. Myna jerde óziniń túımesi bar. Ony tesiginen ótkizip, retteýge bolady. Bolashaq analarǵa arnalǵan kıimderdiń barlyǵy ámbebap. Árqaısysynda sángerdiń qoltańbasy jatyr. «Dárıa» brendiniń ómirge kelýine Ásel Jekenovanyń júktiligi túrtki bolypty. Kıim tańdaýda talaı mashaqatty bastan ótkizgen kelinshek bolashaq analarǵa arnalǵan kóılekter tigýdi qolǵa alady. 12 adamdy jumyspen qamtyǵan otandyq óndiristiń órisi keńeıýde.
Ásel Jekenova, sánger, jeke kásipker:
- Bolashaq analarǵa arnalǵan kıimderdiń ereksheligi bar. Suranys boıynsha tizeden uzynyraq kóılekterdi tigemiz jáne qoldary kishkene jabyqtaý, modaǵa saı ashyq tústi kıimderdi shyǵaramyz. 2015 jyly eki koleksıa shyǵardyq: jazǵy jáne qysqy. Bolashaq analardan jaqsy suranys boldy. Myna sehta aıyna 200-ge jýyq ónim tigiledi. Kóılekter men jeıdeler, shalbarlar men beldemsheler barlyǵy da bolashaq analar úshin. Júkti áıelder jastanatyn arnaıy jastyqtar men bala emizýge qajetti toptama satylymda kósh bastap tur.
Roza Shmanova, tiginshi:
- S árpine uqsas jastyqtar júkti áıelder úshin óte yńǵaıly. Bul jastyqty jastanyp uıyqtaýǵa da bolady, otyrǵanda da ishińizge yńǵaıly. Balalardy emizgende qoldanýǵa bolady. Bir sózben aıtqanda, ámbebap jastyq. Bir jyl buryn dúnıege kelgen otandyq brendtiń jetken jetistigi jeterlik. Atyraý jáne Aqtóbe qalalarynda dúkender jelisi bar. Áseldiń jazǵy kıimder toptamasy «Sán men sahna» halyqaralyq sán baıqaýynda ekinshi orynǵa ıe bolǵan. Ol keleshekte sánqoı qyzdar men balalarǵa arnalǵan kıimder tigýdi qolǵa almaq. İsker áıel altyn qursaqty analarymyz kóp bolsa, óndirisimiz órleı beredi degen senimde.
