Almaty men Qapshaǵaı arasyndaǵy jol boıynda belgisiz bir qyzdyń elesi taksı toqtatyp turatynyn jolaýshylar jarysa aıtýda. Bul týraly «Qamshy» portaly «Ekspres K» gazetine silteme jasap habarlaıdy. Jalpy mundaı áńgimeler buǵan deıin de shyqqan. Tipti, Qazaqstannyń ár oblysynda osyndaı saryndaǵy áńgimeler bar. Mysaly, budan biraz jyl buryn Aqtóbe oblysynda jol boıynda tuıaqty qyzdar kezdesti degen ańyzǵa bergisiz áńgime shyqqan edi. Astana, Qaraǵandy mańynan da osyndaı elester kóringen. Osy óńirlerdiń keı turǵyndary bul elesterdi jol boıynda taksıshilerdiń qolynan qaza tapqan qyzdardyń árýaqtary ekenin aıtqan bolatyn. Jol toryǵan, júris-turysy jumbaq bul qyzdar týraly ár óńirde aıtylyp júrgen áńgimelerdiń negizgi mazmuny uqsas. Tek, oqıǵa orny men birdi-ekili jaǵdaılar ǵana ózgertilip aıtylady. Myna Almaty-Qapshaǵaı tas jolynda taksı toqtatyp júrgen qyz týraly sybys ta sondaı. Keı júrgizýshiler onyń da tuıaǵy baryn baıqaǵan. Toqtaǵan kólikterge otyrǵan ol qyz júrgizýshige nómirin aıtyp, úıine habarlasýyn, qyzdarynyń kele jatqanyn aıtýyn suraıtyn kórinedi. Telefon shalǵan adamdar qyzdarynyń erterekte qaza bolǵanyn aıtqanda tań qalǵan júrgizýshiler salonda otyrǵan qyzdyń joq bolyp ketkenin baıqaǵan. «Eles týraly ańyz keń taraǵany sonsha, kóp júrgizýshiler Qapshaǵaı tas jolynda taksı toqtatqan qyzdardyń barlyǵynan qorqyp, toqtamaı ketip jatyr. Bul máseleni birshama zerttedim. Mundaı áńgimelerdiń tarap júrgenine 20 jyldan asypty jáne bul áńgimeler negizsiz emes. Men jol boıynda qaıtys bolǵan qyzdyń ata-anasyn atptym. Olar áli Almaty qalasynda turady. Olarǵa taksı júrgizýshileri birneshe ret qońyraý shalyp, qyzdaryn ákele jatqanyn aıtqan. Ol kisiler tipti, jol boıyna molda aparyp, quran da oqytqan eken», - deıdi Almaty qalasynyń turǵyny Mereı Ryskeldıev. Youtube jelisinde osyndaı árýaqtar týraly vıdeolar da jetip artylatyn kórinedi.