Reseı postınýdstrıaldy qoǵamdy zertteý ortalyǵynyń dırektory Vladıslav Inozemsev Reseı Prezıdenti Vladımır Pýtınniń júrgizip otyrǵan saıasatyn synǵa aldy, - dep habarlaıdy «Qamshy» portaly RBK-ǵa silteme jasap.
Saıasattanýshy atap aıtqanda, 2000 jyldyń basynda (Pýtın bılikke kelgen ýaqyt – red.) bılik basyndaǵylardyń Reseıdi Qytaı syndy qarqyndy ekonomıka ıesi ete almasa da, ekinshi Emırat jasaýǵa múmkindigi bolǵan.
«Búgingi barreline 31 dollardy quraǵan munaı men 77 rúblge teńelgen dollar reseılikterdiń úsh uıyqtasa túsine kirmeıtin edi. Biraq, qazir bul qalypty jaǵdaı retinde qabyldanýda. Bul eń aldymen Kremlge 16 jyl buryn kelgen V. Pýtınniń kesiri», - deıdi V. Inozemsev. Onyń aıtýynsha, munaıdan basqa seneri joq Reseıdiń osal ekonomıkasy Pýtınniń tartystary saldarynan álemdik qaýymdastyqtyń qysymyna ushyraǵan.
Sondaı-aq, saıasattanýshy Pýtın bıliginiń 17 jylyndaǵy jan basyna shaqqandaǵy ishki jalpy ónimdi dollarǵa shaqsa, 2005 jylǵy deńgeıde qalǵanyn aıtady.
«2016 jylǵa arnalǵan İJÓ boljamy 77,2 trln rúbl. 79 rúbldik dollar baǵamyna shaqsaq, bul 2006 jylǵy 26,7 trln rúblge (ol kezdegi dollar baǵamy 27,17 rúbl bolatyn) teń keledi», - deıdi ol.
Sondaı-aq, sońǵy úsh jylda Reseıden 280 mlrd dollar qarajat syrtqa ketken. Áskerı búdjet esesine 7,5 esege artqan. Sońǵy jyldary Reseı bastaǵan eki soǵys ta Reseıdiń paıdasyna sheshiletin túri joq.
Saıasattanýshy, Pýtın bılik etken jyldardaǵy munaı baǵasynyń sharyqtaýy onyń halyq aldynda bilikti basshy retindegi ımıjin jasaýǵa áser etkenin aıtady. 2000-2014 jyldar aralyǵynda munaı baǵasy 28,5 dollardan 102 dollarǵa ósken. Eti basshy bolsa, bul múmkindikterdi sheber paıdalanyp, birneshe jyldyq ósimge negiz bolatyn ekonomıkalyq júıe qurýǵa bolar edi.
Budan basqa sarapshy Reseıdiń ınfraqurylymynyń damymaı qalǵanyn kórshi Qytaı múmkindikterimen salystyra otyryp, synaıdy.
Reseıiń bilim júıesi de búgingi zaman talaptaryna jaýap beretin deńgeıde emes kórinedi. Memlekettik apparat jumysy, áleýmettik baǵdarlamalar da sátsizdikterge ushyraýda.
Osyndaı birneshe baǵytta aıtýly kemshilikterdi tizbeleı kele, saıasattanýshy oıyn «Eldi kóp sóıleıtin, biraq, qolynan naqty eshteńe kelmeıtin adam 10 jyldan artyq basqaryp otyr. Ol óz múmkindikterine emes, syrtqy faktorlarǵa arqa súıeıdi. Bul – derjavalyq sharasyzdyq» dep qorytady.
