Almatyda №65 baǵytyndaǵy shamamen 10 avtobýstyń júrgizýshileri Abaı dańǵylynyń Manas pen Áýezov kósheleriniń qıylysy aralyǵynda eki baǵytta turyp alyp, ereýilge shyqty. Olar osylaısha "Ońaı" júıesine qarsylyq bildirdi, - dep habarlaıdy «Qamshy» portaly Tengrinews.kz – ke silteme jasap. 

"Almaty transport holdıńi" baspasóz qyzmetiniń málimetinshe, qalalyq İİD bul máseleni sheship úlgergen. "Muny ereýil deýge bolmaıdy. Búgin №65 baǵytyndaǵy avtobýs júrgizýshileriniń birine aıyppul salyndy. Júrgizýshiler osyǵan narazylyq tanytqan", - dedi baspasóz qyzmeti ókilderi. Olar júrgizýshige qolma-qol aqsha alǵany úshin aıyppul salynǵanyn aıtty. Aıta keteıik, 11 qańtardan bastap Almatydaǵy qoǵamdyq kólikterde bılet quny tek elektrondy túrde tólenedi.

Baspasóz qyzmetiniń málimetinshe, 18 qańtardan bastap Almatydaǵy qoǵamdyq kólikterde qalalyq İİD qyzmetkerlerimen birge bıletsiz júrgenderdi anyqtaý úshin reıd júrgizilip jatyr. Birinshi kúnniń ózinde 172 bıletsiz jolaýshyǵa ákimshilik aıyppul salynǵan.