2016 jyly májiliste maquldanyp, Prezıdenttiń qol qoıýyn kútip turǵan Jol júrý erejesine qatysty birtalaı ózgertýler bar, - dep habarlaıdy «Qamshy» portaly «Qazaqstan-Zaman» gazetine silteme jasap.

Kúshine enýi múmkin mańyzdy ózgertýlerge kelsek, olar mynadaı: birinshisi — jańa jyldan bastap avtojolaýshylar kólikten polıseıdiń ruqsatynsyz shyǵa alady.

Ekinshisi — qazaqstandyq saqtandyrý kompanıalaryna jol apaty bolǵan jaǵdaıda jol qyzmetine talaptardy qoıý quqyǵyn berýi múmkin.

Úshinshisi — keı aıyppuldar qataıa túsedi dep kútilýde. Máselen, múmkindigi shekteýli tulǵalar mas kúıde kólik basqarsa, júrgizý quqyǵynan aıyrylýy múmkin.

Ózgertilmegen zańǵa sáıkes, múmkindigi shekteýli tulǵalarǵa tek aıyppul salý qarastyrylǵan. Operatıvti qyzmet kólikterine jol bermegender kóbirek aıyppul tóleıtin bolady.

Tórtinshisi — eger júrgizýshi dabyldatyp kele jatqan jedel nemese arnaıy qyzmet kóligine jol bermegen bolsa, burynǵydaı 7 emes, 10 AEK kóleminde aıyppul tóleıdi. Eger dabylmen kele jatqan arnaıy belgileri bar kólikti ótkizbese, 30 AEK kóleminde aıyppul tóleıdi (búginde 10 AEK). Jyl ishinde erejeni qaıta buzatyn bolsa, aıyppul 15 AEK-ten 50 AEK-ke deıin ósedi.

Besinshisi — alkogólge nemese esirtkige medısınalyq kýálandyrýdan bas tartqandardyń jazasy qataıtylady. Májilismender mundaı jaǵdaıda júrgizýshini 2 jylǵa emes, 3 jylǵa kólik aıdaý quqyǵynan aıyrýdy usynýda.

Altynshysy — turaq erejesin buzýǵa qarastyrylǵan aıyppul azaıtylady. Májilismender turaq erejesin buzǵandarǵa 10 AEK emes, 3 AEK kóleminde aıyppul salǵan jetkilikti dep sanaıdy. Al múgedekterge arnalǵan turaqqa kóligin qoıǵandar 50 AEK ornyna 5 AEK tóleý máselesi qarastyrylýda.

Jetinshisi — «ádemi» memlekettik nómirler tizimin keńeıtpek. Endi OOO, ZZZ sıaqty nómirler jáne 717, 838 sıaqty aınaly nómirler satylady. Aınaly nómir quny 150 myń teńge, al ádemi áriptermen bolsa, 300 myń teńge bolady dep kútilýde.

Segizinshisi — kólikti úsh ólshemdi aerografıamen bezendirýge tyıym salý.

Toǵyzynshysy — birneshe ret jol apatyna túskenderge saqtandyrý quny qymbattatylýy múmkin. Bul usynysty Qazaqstannyń qarjygerler qaýymdastyǵy jasaǵan.

Onynshysy — kishigirim jol apatyna qujattardy jol polısıasy ınspektorlarynsyz rásimdeý múmkindigi. Eýroprotokol dep atalatyn bul ádiste júrgizýshiler oqys jaǵdaıdy ózderi kýálandyryp, jolda kedergi bolýdan tezirek qutylýǵa múmkindik alady. Rásimdelgen qujatpen zardap shegýshi tarap saqtandyrýshydan tólem talap ete alady dep kútilýde.

On birinshisi — elektroqozǵaltqyshtary bar velosıpedterdi zańdastyrý.

On ekinshisi — 1 jyldan 3 jylǵa jylǵa deıingi merzimdegi shetel kólikterin ákelý úshin 50 AEK, ıaǵnı 99 myń teńge mólsherinde tólem jasaýy tıis bolady. Al kólik merzimi 3 jyldan asqan bolsa, salyq mólsheri 500 AEK, ıaǵnı 991 myń teńge bolmaq. Búginde Qazaqstanda 4 mln. 400 myń kólik tirkelgen, olardyń jartysyna 18 jyl tolǵan.

Eń sońynda bekitilgen normaǵa toqtalsaq. Qazaqstannyń Densaýlyq saqtaý jáne áleýmettik damý mınıstri 2015 jylǵy 4 qarashadaǵy №853 buıryǵymen kólik basqarýǵa tyıym salatyn medısınalyq qarsy kórsetimder tizimin bekitti.

Sondaı-aq, nazarlaryńyzǵa 2016 jylǵy jańa aılyq eseptik kórsetkishpen esepteglgen aıyppuldar tizbesin usynamyz.