Qazaqstan Prezıdenti Nursultan Nazarbaev Parlament Senaty men Májilisiniń tóraǵalary Qasym-Jomart Toqaev pen Qabıbolla Jaqypov, premer-mınıstr Kárim Másimov, Prezıdent Ákimshiliginiń basshysy Nurlan Nyǵmatýllınmen keńes ótkizdi, - dep habarlaıdy «Qamshy» portaly.

Memleket basshysy  Májilis depýtattarynyń parlament saılaýyn ótkizý týraly bastamasynyń sarapshylar qoǵamynda jáne BAQ-ta keńinen talqylanyp jatqanyn aıtty.

Sondaı-aq, N. Nazarbaev Konstıtýsıalyq keńes tóraǵasy Igor Rogovpen de kezdesti.

Kezdesý barysynda kezekten tys Parlament saılaýyn ótkizý máselesi talqylandy.

Sonymen qatar Qazaqstan Prezıdenti Parlamenttiń qos palatasynyń tóraǵalarymen jáne Premer-Mınıstrmen konsýltasıa ótkizgenin aıtty.   

I.Rogov Konstıtýsıanyń 63-babynyń 1-tarmaǵyna sáıkes, Parlamentti nemese Parlament Májilisin Qazaqstan Prezıdenti Parlament palatalarynyń tóraǵalarymen jáne Premer-Mınıstrmen konsýltasıadan keıin tarata alatynyn aıtty. Sonymen birge, Konstıtýsıalyq keńes tóraǵasy kezekten tys saılaý Parlament nemese Parlament Májilisi ókilettigin merziminen buryn doǵarǵan kúnnen keıin eki aı ishinde ótkiziletinine nazar aýdardy.

I.Rogov Májiliske kezekten tys saılaýdy aldaǵy barlyq deńgeıdegi máslıhat saılaýymen bir mezgilde ótkizý Konstıtýsıa normalaryna tolyq saı keletinin atap ótti.