Keshe Pravoslav álemi atap ótken «Shoqyný meıramynda» qazaqtar da qarap jatpapty. Túngi saǵat 12:00-den bastap kelesi kúngi tún ortasyna deıin shomylý merekesin astanalyqtar da erekshe yqylaspen qarsy aldy, - dep habarlaıdy NUR.KZ.

Shoqyný merekesinde shomylýǵa kelgenderdiń dinı senimderi de ártúrli boldy. Alaıda, bul kúni hrıstıandardyń da, musylmandardyń shomylatyny astanalyqtar úshin tańsyq emes. Shoqyný kúni qatty aıazǵa qaramastan Esilde shomylǵan adamdardyń sanynda shek bolǵan joq. Keıbireýleri qasıetti sýdy alýǵa kelse, endi bireýleri muzdaı sýǵa túsýden bas tartqan joq.

Esilde shomylyp júrgen qazaqtardyń sany tipti orys, ýkraın jáne ózge de slaván tektes ult ókilderiniń sanynan áldeqaıda asyp tústi.

“Siz nelikten shomylýǵa keldińiz” degen suraqqa árkim ártúrli jaýap qatty. Biri “Bizdiń qudaıymyz bir, men dinge bólmeımin” dese, endi biri “Meniń orys dostarym kóp, sondyqtan, olardy qoldaýǵa keldim” dep jaýap berdi.

“Bul densaýlyqqa paıdaly, sol úshin shomylǵym keldi”, “Men birinshi ret keldim. Meniń musylman bolǵanymda turǵan ne bar? Bul densaýlyqqa paıdaly” dep jaýap qaıtarǵandar da bar kórinedi.

Jergilikti bılik dinı rásimdi ótkizýge de bar jaǵdaıdy jasap baqqan. Atalǵan rásimdi ótkizý úshin palatkalar tigilgen qalashyq paıda boldy. Muz sýatyna baratyn aǵash satylar daıyndalyp, kıim aýystyratyn palatkalarǵa aparatyn joldar da aǵashtan jasaldy. Bul kúni qutqarýshylar men jedel járdem ókilderi de qaraýylda boldy.