«Arystan» mamandandyrylǵan lıseıinde ulandyq qaharman, İİİ-dárejeli «Aıbyn» Ordeniniń ıegeri leıtenant Jandos Baıanbaevpen kezdesý keshi ótti, - dep habarlaıdy «Qamshy» portaly Ulttyq ulan «Ońtústik» óńirlik qolbasshylyǵy baspasóz qyzmetine silteme jasap.
Kezdesý barysynda Jandos Baıanbaev lıseı oqýshylaryna óziniń ótken ómiri jaıly áńgimelep, jaýyngerlik qyzmet kezindegi jasaǵan erligine toqtaldy. Aýyr jaraqat alýyna qaramastan, sottalǵannyń qashyp ketýine jol bermegendigi týraly estelik erlik áńgimesi lıseı oqýshylarynyń júrekterine rýh syılaǵandaı boldy. Sonymen qatar kesh barysynda sóz alǵan Ulttyq ulan ardagerleri Gennadıı Faleev pen Ikram Mamedov oqýshylarǵa Ulttyq ulannyń jaýyngerlik tarıhy týraly syr shertip, ulttyq patrıottyq tárbıemen qosa erlik jaıly ósıetterin baıandap berdi. Sonymen qatar Qazaqstan Respýblıkasy Ulttyq ulanynyń tarıhyna toqtalyp, qoǵamdyq tártip, asa qaýipti qylmyskerlerdi quryqtaý sekildi ulandyqtardyń búgingi mindetterin tilge tıek etti.
Erlik jaıly áńgime oqýshylarǵa erekshe áser berip, olar kesh qonaqtaryn uıyp tyńdady, sońynan ózderiniń suraqtaryn da qoıyp jatty.
Osyndaı ádemi kesh barysy Ulttyq ulan batyry Jandos Baıanbaev týraly túsirilgen beınefılmdi kórýmen jalǵasyp, artynan Ulttyq ulan orkestriniń konserttik baǵdarlamasyna ulasty.
İs-shara sońynda ulandyq ókilder «Arystan» mamandyrylǵan lıseı oqýshylaryn bolashaqta ulandyqtardyń qataryn tolyqtyrýǵa shaqyryp, Ulttyq ulannyń áskerı-jaýyngerlik áreketi beınelengen beınetaspany, sondaı-aq, ulandyqtardyń tól basylymy «Qalqan» gazeti men «Búrkit» jýrnalyn arnaıy syıǵa tartty.
- Búgingi kezdesýden úlken áser aldym. «Arystan» mamandyrylǵan lıseıiniń materıaldyq – tehnıkalyq bazasy, oqytýshy quramy joǵary deńgeıde eken. Eń bastysy munda alǵyr da bilikti, talantty oqýshylar bilim alyp jatyr. Osylardyń qatarynan bolashaq qaharmandar shyǵady degen senimdemin,- dep shara sońynda Jandos Qamardınuly óz oıymen de bólisti.
Aıta keteıik, 2014 jylǵy 5 jeltoqsanda «Almaty-Semeı» baǵytynda sottalǵandardy josparly temir jol qaraýylymen tasymaldaý barysynda qaraýyl jeke quramy asa aýyr qylmystar úshin sottalǵan azamattyń qarýly shabýyl arqyly kúzetten qashyp shyǵý áreketin toıtardy. Qaraýyl bastyǵynyń kómekshisi Jandos Baıanbaev pen saqshy Nurasyl Múbárakov ózderiniń otty qarýdan jaraqat alǵandaryna, ómirlerine tóngen naqty qaýipke qaramastan jaýyngerlik qyzmetin janqıarlyqpen oryndap, aram pıǵyldy qylmyskerdiń óz oıyn júzege asyrýyna jol bermedi.
Kórsetken eren erlikteri úshin Qazaqstan Respýblıkasynyń Prezıdenti – Qarýly kúshterdiń Joǵarǵy Bas qolbasshysy Nursultan Nazarbaev óz Jarlyǵymen 7552 áskerı bólimi qaraýyl bastyǵynyń kómekshisi Jandos Baıanbaevty İİİ-dárejeli «Aıbyn» Ordenimen, al saqshy Nurasyl Múbárakovty «Jaýyngerlik erligi úshin» medalimen nagradtaǵan bolatyn.
