Almatyda búgin ıpotekalyq nesıege úı alyp, qaryzyn óteı almaı júrgen ondaǵan boryshker "Kazkommersbanktiń" Ál-Farabı dańǵyly men Jeltoqsan kóshesiniń qıylysynda ornalasqan bólimshesi aldynda narazylyq sharasyn ótkizdi, - dep habarlaıdy «Qamshy» portaly Azattyqqa silteme jasap.

Azattyq tilshisiniń oqıǵa ornynan habarlaýynsha, boryshkerler talaptaryn aıtý úshin bank basshylyǵynyń syrtqa shyǵyp, ózderimen kezdesýin talap etti.

Birneshe bankten ıpotekalyq nesıe alǵan boryshkerler ekonomıkalyq jaǵdaı men teńgeniń úzdiksiz qunsyzdanýyna baılanysty qaryzdaryn tóleı almaı jatqanyn aıtyp, qaryzdardy qaıta esepteýdi, kelisim-sharttyń keı tarmaqtaryn ózgertýdi surady.

Narazylardyń keıbiri kózderi ǵana kórinetindeı etip qarasur mata jamylyp shyqty. Olar bul belgi ózderiniń "qul" bolǵanyn bildiredi deıdi.

Bólimsheden shyqqan ókil boryshkerlerge bank tóraǵasyna qoıatyn talaptaryn jazbasha tapsyrýdy surady. Biraq boryshkerler oǵan qarsylyq bildirip, "Tóraǵa, syrtqa shyq!" dep urandap aıqaılap turyp aldy. Boryshkerler budan soń sol mańǵa jaqyn "Bank SentrKredıt" bólimshesine baryp, onda da talaptaryn málimdedi.