Túrki halyqtarynyń halyqaralyq kongresi ál-Farabı atyndaǵy Qazaq ulttyq ýnıversıtetine «Túrki elderi arasyndaǵy úzdik JOO» ataǵyn berdi. Halyqaralyq marapatqa laıyq bolǵan qazaqstandyq joǵary oqý ornyn Túrki halyqtary halyqaralyq kongresiniń prezıdenti Iahá Iýsıfogly Alıev ál-Farabı atyndaǵy Qazaq ulttyq ýnıversıtetiniń ujymymen kezdesý barysynda habarlady.
Álemniń alty akademıasynyń akademıgi, Túrki halyqtary halyqaralyq kongresiniń prezıdenti, doktor Iahá Alıev bul sheshim 47 Túrki halyqtary men ulystaryn biriktirip otyrǵan halyqaralyq kongrestiń 2015 jyly jeltoqsan aıynda ótken otyrysynda biraýyzdan maquldanǵanyn aıtty. Sodan soń ol QazUÝ rektory, akademık Ǵalym Mutanovty «Túrki álemine sińirgen eńbegi úshin» atty altyn tósbelgimen marapattady.
«Men álemniń kóptegen úzdik ýnıversıtetterinde boldym. Biraq, tek QazUÝ qaıta qurylý aýqymdylyǵymen jáne álemdik reıtıńte azǵana ýaqyttyń ishinde aıtarlyqtaı joǵary kórsetkishke qol jetkizgenimen tańqaldyrady. Qazaqstandyq ýnıversıtettiń joǵary kórsetkishke qol jetkizgeni memleket tarapynan adamı kapıtaldy damytýǵa aıtarlyqtaı kóńil bólinip otyrǵandyǵynyń kórsetkishi jáne bolashaqqa jasalǵan ınvestısıa dep qarastyrýǵa bolady. Óskeleń urpaqtyń bolashaǵyna qamqorlyq tanytýdyń birden bir úlgisi ǵylym men bilimge kóp kóńil bólip júrgen álemdik kóshbasshylardyń biri, QR Prezıdenti N.Nazarbaev», – dedi Iahá Alıev. QazUÝ-dyń úzdik ýnıversıtetter qatarynda ekenin QS World University Rankings halyqaralyq reıtıń nátıjelerinen baıqaýǵa bolatynyn atap ótken jón. Ýnıversıtet halyqaralyq reıtıńte 275-orynda tursa, al túrki elderi arasynda bul reıtıńte birinshi bolyp, kósh bastap tur.
Marapattaý rásimi ál-Farabı atyndaǵy Qazaq ulttyq ýnıversıtetiniń týylǵan kúnimen tuspa-tus keldi. 15 qańtarda QazUÝ-dyń negizi qalanǵanyna 82 jyl toldy. Halyqaralyq marapat QazUÝ ujymy úshin ǵylym men bilim salasynda jańa jetistikter men marapattarǵa shabyttandyrar jaǵymdy jańalyq boldy.
