Qazaq jurtynyń Astanasyna kópten beri at basyn tiregenim - bıylǵy jyldyń qańtarynyń basy...
Múgedek ulym Muhtarymdy Astanadaǵy Respýblıkalyq balalardy ońaltý ortalyǵyna emdeýge alyp keldim.
Qys qaqap tur. Qar mol. Jol kúresin...
Qalanyń ári eski, ári jańa ákiminiń tıanaqtylyǵynyń taby ma, álde, óz isin tereń meńgergen sheberdiń qolynyń kıesi me, áıteýir, jeli yzǵarly qala jyp-jınaqy qyzdyń úıindeı úlbirip tur...
Alystan menmundalaǵan munarly Aqordanyń da aıbary asqaq...
Bas qalamyzdyń basty qurylysshysy hám salıqaly sáýletshisi Elbasymyz: «Men keń dala tósimen esile aǵyp jatqan Esildiń búlkilsiz sýy betine qazaqstandyq kúnniń qalaı sáýle shashyp shaǵylysqanyn kóremin. Ol qala shegindegi adam qolymen jasalǵan jańa ózen arnasy sýynda shomylyp júredi... Keı kezderi men túngi Astana kóshelerinde kólikpen nemese jaıaý júremin. Árkez meniń júregimdi elorda úshin maqtanysh sezimi kerneıdi. Ózime – ıá, biz osyny jasadyq deımin!» - dep jazypty...
Rasynda, qazaq Astanasynyń symbatty sáýleti men ásem áleýetine eriksiz kóz toqtatyp, kóńil toǵaıady: álemdegi eń úlken sáýletti Han Shatyry, bolmysy bıik Báıterek, qyran qusy zeńgirge zaýlaǵan «Qazaq eli» monýmenti, birlik pen kelisimniń qutty ordasy Beıbitshilik jáne kelisim saraıy, Aqordanyń qos ókpesiniń tynysyn ashqan Esildiń eren kópirleri, «Astana Opera», «Pıramıda», «Máńgilik El» keshenderi... aıtyp taýysa almaısyń...
Jurttyń bári biledi: qazaqtyń elordasynyń sáýletinde aty adamzatqa máshhúr sáýlet óneriniń jampozdary aǵylshyn Norman Fosterdiń, japon Kıse Kýrokavanyń, ıtalıan Manfredı Nıkolettıdiń alaqandarynyń izi qaldy. «Túrki áleminiń mádenı astanasy» qurmetti ataǵynyń ózi jeńil jaýapkershilik júktemeıdi...
Ádilbek Ryskeldiuly Jaqsybekov – Astananyń alǵashqy kirpishin qalasqandardyń biregeıi. Segiz jeldiń yzǵary óńmeninen ótse de, órlikpen kúndiz-túni qala salǵandardyń kóshbasynda da Ádekeń tur...
Halqy 4 esege jýyq, bala týý kórsetkishi 2 esege ósken Astana qalasynyń áleýmettik áleýeti Ádilbek Jaqsybekov qaıta soǵyp, basshy bolǵaly edáýir eselenip, densaýlyq saqtaý salasynyń qýatty keshenine aınalypty.
Syrqat ulym Muhtaryma shıpa izdep kelgen men, eń aldymen, osyndaı orasan ózgeristi anyq sezindim. Biriktirilgen jańa medısınalyq klasterdi 6 zamanaýı emhanalar: Ana men balany qorǵaýdyń ulttyq ǵylymı ortalyǵy, Neırohırýrgıa ǵylymı ortalyǵy, Dıagnostıkalyq ortalyq, Balalardy ońaltý ortalyǵy, Ulttyq ǵylymı kardıohırýrgıalyq ortalyq, Jedel medısınalyq kómek ǵylymı ortalyǵyn qurypty. Balaǵa qamqorlyq degenimiz - bolashaqqa qamqorlyq. Bolashaǵynyń qamyn búginnen kúıittegen eldiń keleshegi kúngeıli bolady...
Ózi fýtbol dese ishken asyn jerge qoıatyn qalanyń qazirgi ákiminiń astanalyqtardyń densaýlyǵyna aıryqsha kóńil bóletindigi aıqyn kórinip tur. Sýjańa sport ǵımarattarynyń keń jelisi mynadaı: «Alaý» muz sporty saraıy, Respýblıkalyq velotrek, «Qazaqstan» men «Alataý» sport keshenderi, «Astana-Arena» jabyq stadıony, ondaǵan sport alańdary, klýbtar men fıtnes ortalyqtary t.s.s. Buǵan qosa, ekologıalyq tazalyqty saqtaýshy teplovozdar, tikushaqtar, vagondar, kún batareıalarynyń modýlderin shyǵara bastaǵan Astana - jańa ónerkásip salalarynyń negizin saldy.
Aýa tunyq, tynys keń bolýy úshin Ádekeńniń bastamasymen saıabaqtar men gúlzarlardyń, kógaldy alańdar men sýbúrkekterdiń kúrt kóbeıgeni de zańdylyq. Investısıasynyń jalpy kólemi 4 trıllıon teńgeden asqan elordanyń erteńi eren.
«Batystyń syrbazdyǵy men Shyǵystyń tereń rýhanı dástúrlerin boıyna berik sińirgen» (Nursultan Nazarbaev) Astana - sóz joq, kúlli jańashyldyq pen ınovasıanyń júregi ǵana emes, elimizdiń iri ǵylymı-bilim berý ortalyǵy bolyp tabylady.
Jasampaz elordada 70 memlekettik, 12 memlekettik emes mektepter; 78 memlekettik, 60 memlekettik emes mektepke deıingi mekemeler jumys isteıdi. Múldem jańa ǵylymı-bilim berý júıesiniń kóshbasshysy Nazarbaev Ýnıversıteti boı kóterdi.
Qazaq Astanasynyń irgetasyna qalanǵan alǵashqy kirpishterdi biletin Ádilbek Ryskeldiuly qalanyń jylý komýnıkasıalary men elektr jelileriniń qýattary ulǵaıtty. Arnaıy ekonomıkalyq aımaqtar men tehnoparkter qala ekonomıkasynyń túrli sektorlaryna joǵary tehnologıalardy engizýge yqpal etip, ınfraqurylymdardy jańǵyrtý men keńeıtýge jol ashty.
Qazaq jurtynyń baıyrǵy astanalary men kóne qalalarynyń san ǵasyrlyq shejiresin eske salatyn Aqmeshit, Orynbor, Túrkistan, Saraıshyq, Saýran, Syǵanaq, Almaty kósheleri – elordany elimizdiń mádenı jáne rýhanı ortalyǵy ekendigine meńzeıdi.
Aınalasyn qaraǵaı men shyrsha, qaıyń men sheten qorǵap-qorshalap, az ýaqyttyń ishinde sáýleti men saltanaty jarasqan Astana - Qazaq Elin álemdik órkendeýdiń zańǵar shyńdaryna jeteleıdi. Óıtkeni, bas qalanyń tizgini qıaǵa salsa - tartynbaǵan, jarǵa ushyrsa - jarqyldaǵan myqty memleketshil tulǵa Ádilbek Jaqsybekovtyń qolynda.
Kánigi qoldyń qýaty degen osy.
Qajymuqan ǴABDOLLA
