جاقىندا اياعى اۋىر ءبىر اپكەمىز بوساندى. تۇرمىسى تاۋىرلەۋ ەدى. سول ءۇش ايلىق نارەستەسىنىڭ يتكويلەكتەرى مەن سىيعا كەلگەن كاستومشىكتەرىن سىيعا تارتپاق بولىپ سايتقا باس سۇقتى.سودان تەلەفونعا تىنىم بولمادى. سەنەسىز بە، حابارلاسقانداردىڭ اراسىندا اياق-قولى بالعاداي، شىرتتاي كيىنگەن، تاقىمىندا تەمىر تۇلپارى بار، سىر-سىمباتى كەلىسكەن كەلىنشەكتەر دە كەزدەسىپ جاتتى. اپايىمنىڭ بار ويى تۇرمىسى ناشار، الەۋمەتتىك تۇرعىدان از قامتىلعان ءبىر وتباسىنا تارتۋ ەتۋ. ءبىر تاڭقالارلىعى سۇراۋشىلاردىڭ دەنى «راسىمەن دە، ايىرباسقا ەشتەڭە المايسىز با؟» دەيدى. باستاپقىدا اڭ-تاڭ بولعان ەدىك «ايىرباسى نەسى؟» -دەپ. ءمانىسىن كەيىن تۇسىندىك.
سويتسەك، سوڭعى ۋاقىتتاردا سىيعا تارتام دەپ الىپ اقى سۇراۋ كەيبىر تانىمال جەلىلەردىڭ حابارلاندىرۋ بەرۋشىلەرى ءۇشىن سانگە اينالعان ەكەن. «كۇرتەشەمدى 2 كەلى اپەلسينگە، كەۋدەشەمدى ءبىر كەلى بانانعا ايىرباستايمىن، گيتارامدى 4 كەلى الماعا الىڭىز» سىندى حابارلاندىرۋلار جوعارىداعىداي جەلىلەردە ءورىپ ءجۇر. شاقالاعىنىڭ سىيماي قالعان كيىمىن شەمىشكەنىڭ مايىنا، قۇمشەكەرگە، كامپيتكە، توساپقا، كارتوپقا اۋىستىرام دەۋشىلەردى دە ءدال وسى جەردەن كەزدەستىرەسىز. ءتىپتى، اسىل تۇقىمدى يت-مىسىعىڭىز بولسا، «بۋدانداستىرۋ» ارقىلى دا «ءتاپ-تاۋىر» تيىن-تەبەنتابۋعا بولادى.مۇندايدا تىشقاننىڭ تەزەگىنەن تەڭگە جاساعان قايران قوجەكەڭنىڭ قىلىعى ەسكە تۇسەدى. ايتپاقشى، جوعارىداعى ءتورت اياقتىلاردىڭ تەكسىزدەرى تەگىن. تەكسىزدەن تەكتى تۋاتىنىنا نانبايتىندار ونى ءقايتسىن. جان باعا الماي وتىرعان جانۇيالار ءۇشىن تاماققا ورتاق جان قانشالىقتى كەرەك؟
جالپى، بۇقارا حالىقتىڭ بۇلايشا قۋ قۇلقىننىڭ قۇلىنا اينالۋىنا نە سەبەپ؟ الدە، كوك قاعاز قۇنىنىڭ كۇرت ءوسۋى، داعدارىستىڭ دىمقىل لەبىن سەزىنىپ ۇلگەرگەن حالىقتىڭ تەگىن كەتكەنشە، تىم قۇرىسا تاماعىما كەتسىن دەگەن ىشكى نيەت-پەيىلىنەن تۋعان با، بۇل؟ اراننىڭ اشىلۋى اشىققاندىعىنىڭ بەلگىسى شىعار بالكىم؟...
باياعىدا...باياعىدا دەيمىز-اۋ، كۇنى كەشەگە دەيىن جۇرت كونەتوز، توزىعى جەتكەن، تار بولىپ قالعان كيىم-كەشەگىن تۋما-تۋىسقا، تۇرمىسى تومەن وتباسىلارعا تاراتىپ بەرەتىن. وسىلايشا ەسكى كيىم ەگەسىن تاباتىن. ءارى قوقىسقا كەتكەنشە، كول-كوسىر ساۋاپقا كەنەلگەنگە نە جەتسىن. بۇگىنگى جاعداي باسقاشا. جالپى بۇل راسىندا جۇرتتىڭ پەيىلىنىڭ بۇزىلعانىنان دا حابار بەرەتىندەي. بۇلاي دەۋىمىزگە نەگىز جوق ەمەس. ءبىر ساعاتتاي اتالمىش جەلىدە وتىرعاندا بايقاعانىمىز، ساتۋشى-ايىرباسشىلاردىڭ اراسىندا تۇرمىسى ءتاۋىر جاندار جەتەرلىك. تەك توز-توزى شىقسا دا بەرگىسى جوق.
ەكىنشىدەن، بۇل-بۇگىنگى قوعامنىڭ جانايقايى.قارا حالىقتىڭ الەۋمەتتىك حال-احۋالىنان دا حابار بەرەدى. شەتتەي بالا شاعاسى بار، اسىراۋشىسىنان ايىرىلعان قالتاسى جۇقا، قولى قىسقا جاندارعا كولدەي كومەك بولماسا دا جىرتىققا جاماۋ، ماتەريالدىق دەمەۋ.تۇراقتى جۇمىسى جوق، جاعدايى تومەن اياعى اۋىر انالار ءۇشىن جوعارىداعىداي جەلىلەردى جاعالاپ ايىرباسقا العان اناعۇرلىم ءتيىمدى. توزىپ قالماسا از دا بولسا ازىق-تۇلىك، جەمىس-جيدەكتىڭ ءرولىن تاعى اتقارادى. تەگىن بەرە قالسا دا كانە. وكىنىشتىسى، مۇندايلارعا جوعارىدا ايتىپ وتكەنىمىزدەي الەۋەتى جوعارىلاردىڭ جاعالاساتىنى.
سالتانات ءالىمقۇلوۆا
پىكىر قالدىرۋ