ورال قالاىنداعى ءىرى ساۋدا ورتالىقتارىنىڭ بىرىندەگى دارەتحانا ىشىنە قويىلعان بەينەكامەرا جۇرتشىلىقتىڭ نارازىلىعىن تۋعىزۋدا، - دەپ حابارلايدى «قامشى» پورتالى Tengrinews.kz-كە سىلەمە جاساپ.

بەينەقۇرىلعى دارەتحانا ىشىندەگى پيسسۋارلاردىڭ ءدال ۇستىنە ورناتىلعان كورىنەدى. ادام قۇقىعىن قورعاۋ جونىندەگى بيۋرونىڭ وسى وبلىستاعى وكىلى پاۆەل كوچەتكوۆ بۇل ارەكەتتىڭ زاڭعا تومپاق كەلەتىنىن ايتىپ وتىر.

«بۇل ادام قۇقىعىن تۋرا ماعىناسىندا اياققا تاپتاۋ. ق ر قىلمىستىق كودەكسىندە 147-باپ بار. سول باپ وسى قۇقىقتى قورعايدى. سونىمەن قاتار، قازاقستان ازاماتتارىنىڭ جەكە ءومىرىنىڭ قاۋىپسىزدىگى مەن قول سۇعىلماۋشىلىعىنا كەپىلدىك بەرەتىن قانشاما حالىقارالىق زاڭدار مەن پاكتىلەر بار. بەينەجازبا قانداي ماقساتپەن جۇرگىزىلەتىنى بەلگىسىز عوي. ونىڭ ۇستىنە كىم بىرەۋدىڭ ءوزىنىڭ دارەتكە وتىرعانىن كورگەنىن قالايدى؟»، - دەيدى زاڭگەر.

ال، ساۋدا ورتالىعىنىڭ اكىمشىلىگى بەينەكامەرانىڭ لاڭكەستىك ارەكەتتەردىڭ الدىن الۋ ءۇشىن قويىلعانىن ايتىپ اقتالۋدا.

«ءبىزدىڭ ساۋدا ورتالىعىنىڭ اينالاسى تولىق بەينەباقىلاۋ جۇيەسىمەن جابدىقتالعان. بۇل لاڭكەستىك ارەكەتتەر ورىن الماس ءۇشىن كەرەك. ونداي جاعدايدان ەشكىم قورعالماعان. ءبىز بۇل ماسەلەدە حالىقارالىق تاجىريبەگە جۇگىنەمىز. كامەرالاردىڭ ورنالاسۋى ىشكى ىستەر ورگاندارىمەن كەلىسىلگەن، ەشقانداي زاڭ بۇزۋشىلىق جوق»، - دەيدى CityCenter ساۋدا ورتالىعىنىڭ قاۋىپسىزدىك قىزمەتىندەگىلەر. ولاردىڭ ايتۋىنشا، بەينەكامەرا دارەتحاناعا كىرەبەرىس ەسىككە باعىتتالعان كورىنەدى.