بۇگىن تاڭعى ساعات 07:00-دە الماتى قالاسىندا 653 سايلاۋ ۋچاسكەسى اشىلىپ، جالپىۇلتتىق رەفەرەندۋمعا داۋىس بەرۋ باستالدى. العاشقى مينۋتتان-اق قالانىڭ بارلىق اۋدانىنداعى ۋچاسكەلەردە تۇرعىنداردىڭ بەلسەندى قاتىسۋى بايقالدى. كوپتەگەن الماتىلىق دەمالىس كۇنى تاڭەرتەڭ ەرتە كەلىپ، داۋىس بەرۋدى ءجون كورگەن.

سايلاۋ ۋچاسكەلەرىندە مەرەكەلىك كوڭىل كۇي قالىپتاستى. قالا تۇرعىندارى ءۇشىن ەستەلىك سۋرەتكە تۇسۋگە ارنالعان تاقىرىپتىق فوتوايماقتار ۇيىمداستىرىلىپ، ءداستۇر بويىنشا العاش داۋىس بەرگەن ازاماتتارعا شاعىن سىيلىقتار ۇسىنىلدى.

الماتىدا بارلىق ازاماتتىڭ داۋىس بەرۋىنە قاتىسۋىنا قولايلى جاعداي جاساۋعا ەرەكشە كوڭىل بولىنگەن. كورۋ قابىلەتى بۇزىلعان ازاماتتار ءۇشىن بيۋللەتەندەرگە ارنالعان برايل قارپىمەن جازىلعان ارنايى ترافارەتتەر دايىندالدى، ال داۋىس بەرۋ كابينالارى ەرەكشە قاجەتتىلىگى بار ادامدارعا بەيىمدەلگەن. سونىمەن قاتار ۋچاسكەلەردە سيفرلىق قولداۋ ۇيىمداستىرىلىپ، ونلاين سۋردواۋدارماشىلار ەستۋ قابىلەتى بۇزىلعان ازاماتتارعا قاجەتتى اقپارات الۋعا كومەكتەسەدى.

مۇمكىندىگى شەكتەۋلى ازاماتتاردىڭ ۋچاسكەلەرگە بارۋىن جەڭىلدەتۋ ءۇشىن «ينۆاتاكسي» قىزمەتى دە ىسكە قوسىلدى. بۇل قىزمەت تۇرعىنداردىڭ سايلاۋ ۋچاسكەلەرىنە كەدەرگىسىز جەتۋىنە مۇمكىندىك بەرەدى. ال جاسى ۇلكەن نەمەسە دەنساۋلىعىنا بايلانىستى ۋچاسكەگە كەلە المايتىن ازاماتتار ءۇشىن ۇيدە داۋىس بەرۋ ۇيىمداستىرىلعان. سايلاۋ كوميسسياسىنىڭ مۇشەلەرى كوشپەلى جاشىكتەرمەن تۇرعىنداردىڭ مەكەنجايىنا بارىپ، ءاربىر ازاماتتىڭ رەفەرەندۋمعا قاتىسۋىنا مۇمكىندىك جاساپ وتىر.