2020 جىلدان بەرى قازاقستاندا 1،1 ملن وقۋشى ورنىنا ارنالعان 1 242 جاڭا مەكتەپ سالىندى. وسى اۋقىمدى جۇمىستىڭ ناتيجەسىندە ءۇش اۋىسىمدى مەكتەپتەر سانى 4 ەسەگە، اپاتتى عيماراتتار سانى 2،5 ەسەگە، ال وقۋشى ورنىنىڭ تاپشىلىعى 4 ەسەگە قىسقاردى.

مەكتەپ جەلىسىن جاڭارتۋداعى ەڭ ءىرى قادام قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ باستاماسىمەن ىسكە قوسىلعان «كەلەشەك مەكتەپتەرى» ۇلتتىق جوباسى بولدى. ءۇش جىل ىشىندە، 2023 جىلدان 2025 جىلعا دەيىن، ەلدە جالپى سىيىمدىلىعى 460 مىڭنان استام وقۋشىعا ارنالعان 217 جاڭا فورماتتاعى مەكتەپ پايدا بولدى. جاڭا عيماراتتار اۋدانى بويىنشا بۇرىنعى تيپتىك جوبالاردان 15–20%-عا كەڭ، ال تەحنيكالىق جابدىقتالۋ دەڭگەيى ولاردان ءتورت ەسە جوعارى. ءاربىر مەكتەپتە ەڭبەككە باۋلۋ شەبەرحانالارى، مۋزىكا جانە حورەوگرافيا زالدارى، STEM-زەرتحانالار، روبوتوتەحنيكا كابينەتتەرى، كوۆوركينگ-ايماقتار جانە سپورت زالدارى جۇمىس ىستەيدى. جوبا 43 ءۇش اۋىسىمدى جانە 8 اپاتتى مەكتەپتىڭ ماسەلەسىن تولىقتاي شەشۋگە مۇمكىندىك بەردى. بارلىق كەزەڭدەردە ساپانى جۇيەلى باقىلاۋدى جوبانى ۇيلەستىرۋشى ى. التىنسارين اتىنداعى ۇلتتىق ءبىلىم اكادەمياسى قامتاماسىز ەتەدى.

جاڭا عيماراتتار سالۋمەن قاتار، قولدانىستاعى مەكتەپتەردى اۋقىمدى رەنوۆاسيالاۋ جۇرگىزىلۋدە. مەملەكەت باسشىسىنىڭ تاپسىرماسىمەن 1 300 مەكتەپتى ءبىرىڭعاي زاماناۋي فورماتقا كوشىرۋ باعدارلاماسى ىسكە قوسىلدى. 2025 جىلى وسى باعدارلاما بويىنشا 190 مىڭ ورىنعا ارنالعان 245 مەكتەپ جاڭارتىلدى. جاڭارتىلعان عيماراتتاردا كىتاپحانالار، اسحانالار مەن سپورت زالدارى جوندەلىپ، قاۋىپسىزدىك جۇيەلەرى رەتتەلدى.

قوسىمشا قارجىلاندىرۋ كوزى رەتىندە پرەزيدەنتتىڭ تاپسىرماسىمەن قۇرىلعان ءبىلىم بەرۋ ينفراقۇرىلىمىن قولداۋ قورى جۇمىس ىستەيدى. جەمقورلاردان تاركىلەنگەن قاراجات ەسەبىنەن 86 مىڭ ورىنعا ارنالعان 77 مەكتەپتىڭ قۇرىلىسى اياقتالدى. ولاردىڭ باسىم بولىگى دەموگرافيالىق جۇكتەمەسى جوعارى ايماقتاردا ورنالاسقان: الماتى، تۇركىستان، قىزىلوردا، جامبىل وبلىستارى مەن استانا قالاسىندا.

مەملەكەت باسشىسى قويعان باسىم مىندەتتەردىڭ ءبىرى قالالىق جانە اۋىلدىق مەكتەپتەر اراسىنداعى ءبىلىم ساپاسى الشاقتىعىن جويۋ بولىپ تابىلادى. «كەلەشەك مەكتەپتەرى» جوباسى بويىنشا سالىنعان مەكتەپتەردىڭ ءاربىر ەكىنشىسى دەرلىك اۋىلدىق جەردە ورنالاسقان، بارلىعى 84 نىسان. رەنوۆاسيا باعدارلاماسى قامتىعان 1 300 عيماراتتىڭ 820-سى دا اۋىلداردا ورنالاسقان. جىل سايىن 1 000 وقۋ ورنىندا پاندىك كابينەتتەر جاڭارتىلا وتىرىپ، جوندەۋ جۇرگىزىلەدى. سونىمەن قاتار، وقۋ-اعارتۋ مينيسترلىگى شاعىن جيناقتى جانە اۋىلدىق مەكەمەلەردەگى ءبىلىم ساپاسىن ارتتىرۋ، كادرلىق قامتاماسىز ەتۋ مەن قاۋىپسىزدىك ماسەلەلەرى بويىنشا ستراتەگيالىق شەشىمدەر دايىنداۋدا.