الماتىداعى «راديو ءۇيى» عيماراتىندا «شالقار» راديوسىنىڭ تولىق جوندەۋدەن وتكەن جاڭا ستۋدياسى سالتاناتتى تۇردە اشىلدى. جاڭا ستۋدياعا قازاقتىڭ تۇڭعىش راديوديكتورى، قازاق راديوسىنىڭ ارداگەرى، كسرو-نىڭ قۇرمەتتى ءراديسى، قازاق كسر-نىڭ ەڭبەك سىڭىرگەن مادەنيەت قايراتكەرى مينا سەيىتوۆانىڭ ەسىمى بەرىلدى.
سالتاناتتى شاراعا راديو سالاسىنىڭ ارداگەرلەرى، قازىرگى قىزمەتكەرلەرى جانە بۇقارالىق اقپارات قۇرالدارىنىڭ وكىلدەرى قاتىستى. ستۋديانىڭ تۇساۋكەسەر راسىمىندە رۋسلانا قۇدايبەرگەنوۆا، ساۋىق جاقانوۆا، التىن يمانبايەۆا سىندى راديونىڭ ءبىرقاتار اعا بۋىن وكىلدەرى ءسوز سويلەپ، بۇل باستامانىڭ ماڭىزدىلىعىن اتاپ ءوتتى.
جاڭا ستۋديا «شالقار» راديوسىنىڭ 60 جىلدىق مەرەيتويى اياسىندا، تالاي ديكتورعا ءتالىم بەرگەن ۇستاز، راديو ونەرىنىڭ كورنەكتى وكىلى مينا سەيىتوۆانىڭ جارقىن ەسىمىن ۇلىقتاۋ ماقساتىندا اشىلدى.
بۇگىننەن باستاپ جاڭا ستۋديادان «شالقار» راديوسىنىڭ تىكەلەي ەفيردەگى وننان استام باعدارلاماسى تىڭدارمانعا جول تارتادى. زاماناۋي ۇلگىدە جابدىقتالعان ستۋديا قابىرعاسىنا مينا سەيىتوۆانىڭ پورترەتى ورنالاستىرىلىپ، ينتەرەردە استانا مەن الماتى قالالارىنىڭ كورىكتى جەرلەرى بەينەلەنگەن.
مينا سەيىتوۆا 1919 جىلى 20 تامىزدا قوستاناي وبلىسى قارابالىق اۋدانىنىڭ №9 اۋىلىندا دۇنيەگە كەلگەن. ول 1934 جىلى نەبارى 15 جاسىندا قازاق راديوسىنا قىزمەتكە قابىلداندى.
ەكىنشى دۇنيەجۇزىلىك سوعىس جىلدارى ماسكەۋدەن تاراعان رەسمي اقپاراتتاردى كسرو حالىقتارىنا يۋريي ليەۆيتان جەتكىزسە، قازاق دالاسىنا سوعىس حابارلارىن مينا سەيىتوۆانىڭ ءۇنى جەتكىزدى.
ول ميكروفون الدىندا 44 جىل قىزمەت ەتىپ، راديو سالاسىندا بىرنەشە بۋىن ديكتور مەن مادەنيەت قايراتكەرلەرىن تاربيەلەدى. ونىڭ شاكىرتتەرىنىڭ قاتارىندا قازاق كسر-ىنىڭ حالىق ءارتىسى انۋاربەك بايجانبايەۆ، كسرو حالىق ءارتىسى ەرمەك سەركەبايەۆ، قازاق كسر-ىنىڭ حالىق ءارتىسى زامزاگۇل ءشارىپوۆا، اقىن مۇقاعالي ماقاتايەۆ، كسرو حالىق ءارتىسى بيبىگۇل تولەگەنوۆا، ديكتورلار مامبەت سەرجانوۆ، گەنناديي ماريۋحين، قازاقستاننىڭ ەڭبەك سىڭىرگەن قايراتكەرى ساۋىق جاقانوۆا جانە باسقا دا تانىمال تۇلعالار بار.
قازاقتىڭ تۇڭعىش ديكتورى مينا سەيىتوۆا ەڭبەك جولىندا بىرنەشە جوعارى مەملەكەتتىك ناگرادالارمەن ماراپاتتالعان. 1978 جىلى قۇرمەتتى دەمالىسقا شىعىپ، 1987 جىلى دۇنيەدەن ءوتتى.
