البانيانىڭ مەملەكەتتىك سايلاۋ كوميسسارى قازاقستانداعى رەفەرەندۋمنىڭ اشىقتىعى مەن تاريحي ماڭىزىن اتاپ ءوتتى.

قازاقستاندا وتكەن رەسپۋبليكالىق رەفەرەندۋمنىڭ ءوتۋ بارىسىن حالىقارالىق باقىلاۋشىلار دا قاداعالاپ جاتىر. سولاردىڭ ءبىرى - البانيا رەسپۋبليكاسىنىڭ مەملەكەتتىك سايلاۋ كوميسسارى يليردجان چەليباشي. ول قازاقستانعا ورتالىق سايلاۋ كوميسسياسىنىڭ شاقىرۋىمەن كەلگەن.

شەتەلدىك دەلەگاسيا استانا قالاسىنداعى بىرنەشە داۋىس بەرۋ ۋچاسكەسىندە بولدى. باقىلاۋشىلار بارعان نىسانداردىڭ ءبىرى - استانا قالاسى اكىمدىگىنىڭ «№119 جالپى ءبىلىم بەرەتىن مەكتەبى» كوممۋنالدىق مەملەكەتتىك مەكەمەسىندە ورنالاسقان رەفەرەندۋم ۋچاسكەسى.

يليردجان چەليباشي بۇل ونىڭ قازاقستانعا العاش رەت كەلۋى ەكەنىن ايتتى.

«مەن البانيا رەسپۋبليكاسىنىڭ مەملەكەتتىك سايلاۋ كوميسسارى بولىپ قىزمەت اتقارامىن. قازاقستانعا ورتالىق سايلاۋ كوميسسياسىنىڭ شاقىرۋىمەن كەلدىك. بۇل - مەنىڭ دە، ءبىزدىڭ دەلەگاسيانىڭ دا قازاقستانعا العاشقى ساپارى»، - دەدى ول.

حالىقارالىق باقىلاۋشىنىڭ ايتۋىنشا، رەفەرەندۋم بارىسىندا كورگەن دايىندىق جۇمىستارى جاقسى اسەر قالدىرعان.

«ءبىز بىرنەشە ۋچاسكەدە بولدىق. داۋىس بەرۋ پروسەسىنىڭ قالاي ءوتىپ جاتقانىن كوردىك. كوميسسيا مۇشەلەرىمەن سويلەستىك، داۋىس بەرۋ ءتارتىبى تۋرالى سۇرادىق. بارلىعى تۇسىنىكتى تۇردە ۇيىمداستىرىلعان. قازىرگى كورىپ وتىرعانىمىز بويىنشا، دايىندىق جاقسى دەڭگەيدە»، - دەدى چەليباشي.

ونىڭ سوزىنشە، رەفەرەندۋمنىڭ ناقتى باعاسى داۋىس بەرۋ اياقتالعاننان كەيىن عانا بەرىلەدى.

«قورىتىندىنى كۇن سوڭىندا عانا ايتۋعا بولادى. ءبىز ءالى بىرنەشە ۋچاسكەگە بارامىز. ءبىراق قازىرگى اسەرىمىز جاقسى، ءبارى تىنىش ءارى رەتىمەن ءوتىپ جاتىر»، - دەدى حالىقارالىق باقىلاۋشى.

البانيالىق كوميسسار رەفەرەندۋمدى دەموكراتيالىق تالاپتاردى نىعايتۋعا باعىتتالعان قادام دەپ باعالاۋعا بولاتىنىن ايتتى.