اسكەريلەر مەن ارنايى مەملەكەتتىك ورگاندار قىزمەتكەرلەرىنىڭ زەينەتكەرلىككە شىعۋ جاسى ۇزارتىلۋى مۇمكىن، - دەپ حابارلايدى «قامشى» پورتالى قازاقپاراتقا سىلتەمە جاساپ.

بۇگىن سەناتتىڭ الەۋمەتتىك-مادەني دامۋ جانە عىلىم كوميتەتىنىڭ كەڭەيتىلگەن وتىرىسى بولىپ ءوتتى. وندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتى جۇمىسپەن قامتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلاندى.

زاڭ جوباسىنا سايكەس، «مۇگەدەكتىك بويىنشا مەملەكەتتىك الەۋمەتتىك جاردەماقىلار تۋرالى»، «زەينەتاقىمەن قامتاماسىز ەتۋ تۋرالى» قولدانىستاعى زاڭدار بيۋدجەت كودەكسىنە سايكەس كەلتىرىلەدى. «اتاپ ايتقاندا، مەديسينالىق الەۋمەتتىك مەكەمەلەردە تۇرىپ جاتقان تۇلعالاردىڭ زەينەتاقىسى مەن جاردەماقىلارى ءۇشىن مەملەكەتتىك مەكەمەلەردە ۋاقىتشا قاراجاتتاردى اۋدارۋعا ارنالعان باقىلاۋ شوتتارى اشىلاتىن بولادى. بۇدان بولەك، جاسىنا بايلانىستى تولەنەتىن زەينەتاقى مولشەرى مەن ەڭبەك ەتكەن جىلدارى بويىنشا تاعايىندالعان زەينەتاقىلار جىل سايىن رەسپۋبليكالىق بيۋدجەت تۋرالى زاڭمەن بەلگىلەنەدى. بۇل رەتتە ۇكىمەتتىڭ جىل سايىنعى زەينەتاقىنى كوتەرۋگە قاتىستى ءتارتىپتى بەلگىلەۋ قۇزىرەتى جويىلادى»، دەيدى زاڭ جوباسى بويىنشا بايانداعان سەناتور ۆلاديمير رەدكوكاشين.

ونىڭ ايتۋىنشا، زاڭ جوباسى بويىنشا ارنايى ورگاندار قىزمەتكەرلەرى ءۇشىن قىزمەتتە بولۋدىڭ شەكتى مەرزىمىن جالپى ازاماتتىق قىزمەتكەرلەر مەرزىمىنە دەيىن ۇزارتۋ قاراستىرىلادى. ماسەلەن، پودپولكوۆنيك شەنىندەگى قىزمەتكەرلەردىڭ قىزمەتتە بولۋ جاسى 47-دەن 50 جاسقا دەيىن، ال جەكەلەگەن جاعدايلاردا ودان دا جوعارىعا كوتەرىلەدى. بۇدان بولەك، ارنايى مەملەكەتتىك ورگاندارداعى اسكەري قىزمەتتەردەن بوساتۋ، سونىمەن بىرگە كەلىسىمشارت بويىنشا قىزمەت ەتەتىن اسكەريلەردىڭ ءوز ەركىمەن جۇمىستان كەتۋى ماسەلەلەرىنە ءبىرىڭعاي ءتارتىپتى ايقىنداۋ ءۇشىن زاڭنامانى بىرىزدەندىرۋ كوزدەلەدى.

تۇتاستاي العاندا، سەناتورلار زاڭ جوباسىن ەكىنشى وقىلىمعا ازىرلەۋ بارىسىندا 35 تۇزەتۋ ەنگىزگەن.

قۇجات پالاتانىڭ الداعى ۋاقىتتا وتەتىن جالپى وتىرىسىنا شىعارىلاتىن بولادى.