ۋكراينا اقش ۇسىنعان قاقتىعىستى توقتاتۋ جوسپارىنا ەلەۋلى وزگەرىستەر ەنگىزدى. بريتانيالىق The Guardian باسىلىمىنىڭ اقپاراتىنا سايكەس، بۇل تۋرالى كەلىسسوزدەرگە قاتىسقان دەرەككوزدەر حابارلاعان. باستاپقىدا 28 تارماقتان تۇرعان قۇجاتتان رەسەيدىڭ ءبىرقاتار قاتاڭ تالاپتارى الىنىپ تاستالدى.
العاشقى نۇسقادا ۋكراينا دونباستاعى كەيبىر قالالاردان اسكەرىن اكەتۋى، ارمياسىنىڭ سانىن شەكتەۋى جانە ناتو-عا كىرمەۋى كەرەك دەگەن تارماقتار بولعان. 28 تارماقتان تۇراتىن باستاپقى اقش-رەسەي جوسپارىن وتكەن ايدا ۆلاديمير ءپۋتيننىڭ ارنايى وكىلى كيريلل دميترييەۆ جانە ترامپتىڭ وكىلى ستيۆ ۆيتكوفف جاساعان.
وتكەن جەكسەنبىدە شۆەيساريادا اقش مەملەكەتتىك حاتشىسى ماركو رۋبيو، ۋكراينا پرەزيدەنتىنىڭ كەڭسەسىنىڭ باسشىسى اندرەي ەرماك جانە باسقا وكىلدەر قاتىسقان كەلىسسوزدەردە بۇل جوسپار قايتا جاساقتالىپ، 19 تارماققا دەيىن قىسقاردى.
ۋكراينا مەن ەۋروپا ەلدەرى كەز كەلگەن اۋماقتىق كەلىسسوزدىڭ نەگىزى قازىرگى مايدان شەبى بولۋى كەرەك ەكەنىن اتاپ ءوتتى.
سونداي-اق اقپاراتتار بويىنشا، ۆلاديمير زەلەنسكيي وسى اپتادا اقش پرەزيدەنتى دونالد ترامپپەن كەزدەسۋى مۇمكىن. كييەۆ ەۋروپانىڭ دا كەلىسسوزدەرگە قاتىسقانىن قالايدى.
