ۋكراينا پرەزيدەنتى ۆلاديمير زەلەنسكيي جەنيەۆادا وتكەن اقش-ۋكراينا بەيبىت كەلىسسوزدەرىندە «ماڭىزدى قادامدار» جاسالعانىن ايتتى. ءبىراق ول رەسەي باسىپ العان شىعىس ايماقتاردى زاڭدى تۇردە تانۋ تۋرالى ۆلاديمير ءپۋتيننىڭ تالابى ءالى دە «نەگىزگى كەدەرگى» ەكەنىن اتاپ ءوتتى.

جەكسەنبى كۇنى شۆەيساريادا اقش پەن ۋكراينا وكىلدەرى سوعىستى توقتاتۋ جولدارىن تالقىلادى. ەكى تاراپ تا كەزدەسۋدەن كەيىن بەلگىلى ءبىر «ىلگەرىلەۋ» بار ەكەنىن مالىمدەدى.

ەندى ۆلاديمير زەلەنسكيي مەن اقش پرەزيدەنتى دونالد ترامپ داۋلى ماسەلەلەردى تالقىلاۋ ءۇشىن كەزدەسۋى مۇمكىن. ءدال ۋاقىت ءالى جاريالانعان جوق.

اۋماق ماسەلەسى رەسەي مەن ۋكراينانىڭ باستى كەلىسپەۋشىلىگى بولىپ قالا بەرەدى. زەلەنسكيي بۇرىن دا ماسكەۋ كۇشپەن باسىپ العان جەرلەردى «سىيلىق» رەتىندە الا المايتىنىن، مۇنداي شەشىم ءقاۋىپتى ۇلگى بولاتىنىن ايتقان.

كەلىسسوزدەردەن كەيىن ترامپ الەۋمەتتىك جەلىدە «جاقسى نارسە بولۋى مۇمكىن» دەپ جازدى. رەسەي دەلەگاسياسى جەنيەۆاعا قاتىسپادى جانە كرەمل بۇل تالقىلاۋلار تۋرالى رەسمي اقپارات الماعانىن حابارلادى. رەسەي پرەزيدەنتىنىڭ باسپا ءسوز حاتشىسى دميتريي پەسكوۆ باستاپقىدا رەسەي قۇپتاعان بەيبىت جوسپارعا وزگەرىستەر ەنگىزىلگەنىن بىلەتىنىن ايتتى.

بۇل 28 تارماقتان تۇراتىن جوسپاردى اقش پەن رەسەي وكىلدەرى قازان ايىندا ازىرلەپ، وتكەن اپتادا ۋكرايناعا ۇسىنعان ەدى. قۇجاتتاعى كەيبىر تارماقتار ماسكەۋدىڭ ۇزاق مەرزىمدى تالاپتارىنا ۇقسايتىنى ءۇشىن ۋكراينا مەن ەۋروپا ەلدەرى الاڭداۋشىلىق ءبىلدىردى.